Kominike Lapolis |30 May 2023
En zonm i ganny sarze dan 2 ka obtenir propriyete lo fo preteks e vole
En zonm 33-an sorti Côte D’Or, Praslin in formelman ganny sarze devan Lakour Mazistra Praslin dan 2 ka obtenir propriyete lo fo preteks e vole.
Sa i apre ki lapolis ti’n resevwar rapor le 3 ek 8 Avril 2023 kot sa aprezan akize ti’n vann tiket vwayaz bato avek en group kliyan etranze pour ekskirsyon an retour kot i ti’n resevwar serten sonm larzan e sa akize pa’n fer sa vwayaz ekskirsyon.
Sa menm akize le 10 Me 2023 dan rezyon lo lans Côte D’Or ti vol serten sonm larzan pour en miner.
Lakour in larg sa akize lo serten kondisyon tel ki pey en lanmann 6 mil roupi dan sakenn son bann ka ki fer en total 18 mil roupi, 2 garanti 5 mil dan sakenn son bann ka pour son laliberte provizwar. Si sa akize i reisi pey sa sonm 18 mil roupi i pou ganny large e i bezwen sivre sa bann kondisyon swivan : (i) siny liv lakour 3 fwa par zour tou le Lendi ek Vandredi ; (ii) en kouvrefe depi 7er diswar ziska 6er bomaten e (iii) pour strikteman pa apros okenn viziter etranze ki lo vakans Sesel.
Sa akize pa’n reisi akord demann lakour ki fer in ganny rimann an detansyon Servis Prizon Sesel ziska le 6 Zen 2023 zour ki i ekspekte repas ankour.
Kominike sorti kot departman Lapolis