Mesaz sorti kot prezidan SLU Ralph Volcère pour Lazournen Travayer |29 April 2023
Ralph Volcère
«Travayer inifye e atrap lanmen kanmarad pour zot kapab kontinyen donn zot mye dan louvraz»
«Linyon Travayer Seselwa (SLU) i swet tou son manm ek tou travayer dan Sesel en tre bon Lafet Travayer. SLU i swete ki malgre tou bann defi ki lafors travayer pe fer fas avek aktyelman, zot ava kapab pas en bon moman detant e refleksyon ansanm.
«Ozordi plis ki zanmen travayer i bezwen inifye e atrap lanmen kanmarad pour zot kapab kontinyen donn zot mye dan louvraz anmenmtan ki zot debout for e solid pour defann e protez zot bann drwa.
«Klima travay Sesel i dan en leta ki pa pe ankouraz dimoun pour al pran en lanplwa. Anmenmtan nou pei i bezwen tou son travayer, bann lorganizasyon e anplwayer i osi bezwen realize ki sikse dan lantrepriz i depan en kantite lo la fason ki travayer i santi zot dan sa louvraz. I alors tre enportan ki anmenmtan ki anplwayer i demann travayer pour donn san poursan (100%), li osi i devret pe kree en lanvironnman travay ki pou ankouraz sa anplwaye pour fer son mye posib…
«I malere ki nou pei pe konmans annan en tre move repitasyon an sa ki konsern la fason ki nou tret travayer etranze. Pa akoz ki sa dimoun in kit en pei kot lavi i tre tre dir e vin travay isi, ki zot merite ganny trete konman zannimo. Tou imen i annan drwa a son dignite.
«Kan en anplwayer i anmenn en travayer etranze isi, i devwar lotorite pour fer sir ki sa dimoun i vreman kapab pran responsabilite sa travayer, alor lo non SLU, mon demande ki gouvernman i met an plas bann mekanizm apropriye pour fer sir ki drwa sa bann travayer nepli ganny abize ankor e aret pini sa bann pov dimoun avek en stati imigran (PI) ki afekte zot drwa.
«SLU i swet tou travayer dan Sesel le meyer e en lafet ranpli avek lazwa!»