Mezir sipor finansyel tanporer i terminen |06 April 2023

Msye Palit ek Madanm Morin pandan konferans lapres

Parey ti anonse dan bidze 2023, mezir tanporer pour soulaz dimoun avek reveni pli ba i terminen apartir mwan Avril 2023.

Sa i vedir ki travayer sekter piblik, prive ek lakonpannyen paraetatik ki ti pe tous en saler mwens ki R8500 e ki ti pe resevwar sa lasistans finansyel tanporer R500 tou le mwan pou nepli resevwar sa lasistans.

Dan en konferans lapres yer bomaten kot Biro Lazans Proteksyon Sosyal, Oceangate House, direkter zeneral pour Planifikasyon Nasyonal, Lenny Palit, akonpannyen par sef egzekitif Lazans pour Proteksyon Sosyal, Brenda Morin, ti elabor plis lo sa klotir e bann lezot mezir lasistans ki anplas.

Msye Palit i eksplike ki sa progranm pe fermen la ki i annan en revizyon saler gouvernman ek paraetatik, kot pou annan deza en logmantasyon.

Msye Palit in dir ki kant a bann kliyan kot Lazans Proteksyon Sosyal, sa i enkli bann ki resevwar benefis pour envalidite, dezabilite e sa ki’n pran retret e ki pe resevwar mwens ki R9000, pou kontinyen ganny lasistans dan sa menm format, ziska lafen lannen.

Msye Palit i anonse ki par kont benefis pour ‘homecarers’ i kontinyen avek ASP anba menm paramet ki vedir tou ‘homecarers’, ki swa sa ki travay zournen ou lanmwatye zournen, pou resevwar en logmantasyon R500 lo zot saler.

“Kwa ki fer sa sitiasyon la diferan, i se ki dat peyman pour dezabilite, envalidite e sa eleman pansyon, pou kontinyen parey in ganny fer sa dernyen detrwa mwan, alafen dimwan. Savedir sa dernyen trwa zour le mwan. Me ‘homecarer’ lefe ki i en valer fiks, sa pou ganny peye anmenmtan ki saler i ganny peye lo sistenm ASP,» dapre Msye Palit.

Fodre note ki i annan serten lezot mezir ki pe kontinyen e sa i enkli goute ek dezennen gratwit pour lekol leta ziska lafen lannen ensi ki lavant komodite STC menm pri lo Mahe, Praslin ek La Digue.

Antretan Msye Palit i azoute ki pour bann nouvo aplikan ASP, pou annan prosedir pour tyeke konbyen sonm maksimonm zot pou kalifye.  « E byen sir lo nou kote i annan serten ‘statutory benefits’ ki nou ekspekte enplimante e revize me selman prenan kont ki nou pou bezwen toultan mazin bidze ek sitiasyon finansyel pei ».

Lo son kote, Madanm Morin i fer resorti ki kantmenm i annan sa bann sanzman ki pe arive, i pa sanz nanryen dan laplikasyon pour lasistans.

“Napa nanryen kot ASP ki sanze, si ou bezwen ankor lasistans ou kapab gannyen. Ou fer ou laplikasyon ki vreman senp. Napa nanryen konplike dan laplikasyon ASP,» i dir.

Mezir pour soulaz dimoun avek saler pli ba ti konsidere par konsey minis lafen Zen lannen pase, e i ti ekspekte reste anfors pour sis mwan ziska Desanm, me ti apre prolonz pour ankor trwa mwan ziska lafen Mars.

Sa bann mezir ti mete anvi bann presyon ek lensertitid ki kriz ant Larisi ek Ikrenn ti pe okazyonnen.

I’n annan enpe plis ki 140 mil tranzaksyon avek en sonm apepre 63 milyon ki’n verse, san kont sonm pour Mars 2023. Anviron 23 mil dimoun in benefisye anba sa bann mezir.

Diane Larame

Portre par Louis Toussaint