Lasanble i sispann deba lo 2 prozedlwa |26 September 2019

Deba lo 2 prozedlwa ki ti pe demande ki i annan serten lamannman pour revwar definisyon turnover dan lalwa Corporate Social Responsibility (CSR) Tax Act 2013 e dan lalwa Tourism Marketing Tax (TMT) Act Act 2013 in ganny anvoye pour plitar.

Bi sa 2 prozedlwa ki ti prezante par Minis responsab pour Finans, Komers, Lenvestisman ek Planifikasyon Ekonomik, Msye Maurice Loustau-Lalanne, ti annan pour bi fer zot definisyon parey definisyon Accessible Income ki annan dan Business Act 2009.

CSR tax i ganny aplike lo bann biznes ki fer en turnover par lao R1 milyon pour lannen avan e peyman sa taks i ganny fer par mwan.

Menm lamannman i aplik pour TMT.

Apre ki Minis Loustau-Lalanne ti’n donn leksplikasyon lo sa 2 prozedlwa, manm lo toulede kote latab ti fer resorti ki menm si zot konpran lentansyon gouvernman zot krwar ki sa bann lamannman pe fer ki sistenm taks pou vin pli konplike e sa pou kre lensertitid parmi envestiser ki pli gro moter dan nou lekonomi olye ankouraz zot pour envestir plis.

Serten manm ti fer resorti ki gouvernman i bezwen zis asire ki sa ki devret pey taks i peye me atraver en mekanizm ki senp.

Apre bokou deba par plizyer entervenan, toulede kote ti dakor pour anvoy deba pour plitar ziska ki minis i pare pour soumet li ankor devan Lasanble.

Minis ti dakor ki sa lalwa i ganny reanmennen pour ganny revwar pour fer rantre bann lamannman ki bann manm in propoze avan ki deba ava kontinyen dan staz komite.