Konkour Literer Nasyonal Regina Melanie 2022-2023 |22 February 2023
Bann gannyan Konkour Literer Regina Melanie dan en portre souvenir avek bann envite (Portre: Louis Toussaint)
Bann gannyan i resevwar zot pri
Pour konmemor Lazournen Enternasyonal Lalang Maternel ki selebre tou le 21 Fevriye, Lakademi Kreol Sesel ti organiz en seremoni prezantasyon pri avek bann gannyan 4enm edisyon Konkour Literer Nasyonal Regina Melanie sorti dan bann lekol leta.
Sa seremoni ti deroul yer bomaten kot sant konferans enternasyonal, e Lakademi Kreol Sesel i dedye sa konkour apre Regina Melanie pour son devosyon konman en ekriven Seselwa, enstrikter alfabetizasyon, ki li osi atraver leson alfabetizasyon, in aprann lir, ekrir e plitar vin en pilye dan devlopman lalang, kiltir ek literatir Kreol Seselwa.
Envite spesyal kot seremoni yer ti sekreter zeneral Lenstiti Nasyonal pour Kiltir, Leritaz ek Lar Sesel, David Andre; sekreter permanan Lenstiti Nasyonal Sesel pour Kiltir, Leritaz ek Lar Sesel, Cecile Kalebi; direkter egzekitif Lakademi Kreol Sesel, Marie Flora BenDavid ensi ki lafanmir Madanm Melanie.
Seremoni ti konmans par en refleksyon swivi par en ladres fer par Madanm BenDavid, ki dir sa lannen zot pe selebre 24enm Lazournen Enternasyonal Lalang Maternel anba tenm, ‘Ledikasyon Miltileng, en nesesite pour transform Ledikasyon’.
“Sa tenm pe envit nou pour ranforsi e vwar potansyel miltilengwizm pour transform ledikasyon dan en perspektiv laprantisaz tou dilon lavi e dan diferan konteks,” Madanm BenDavid ti dir.
I ti eksprimen ki ler i ti ofisyelman lans sa konkour literer ‘Regina Melanie’ e fer son premye remiz pri an Oktob 2017, sa aktivite ti ganny konsidere konman en stratezi inovativ ki Lenstiti Kreol a sa letan ti met anplas.
I ti termin son ladres par remersye tou partisipan ki’n aktiv dan sa konkour.
Pour kategori lapoezi pour Primer 1 ziska Primer 3, premye pozisyon ti al pour Zarine Judea sorti Plaisance, tandiski dan kategori lapoezi Primer 4 a Primer 6 premye pozisyon ti al pour Ryan Marengo sorti lekol Anse Royale.
Dan kategori zistwar kourt P1-P3, venker ti Zoe Faure sorti lekol Mont Fleuri e pour P4-P6 premye pozisyon ti al pour Illya Assary sorti lekol Bel Ombre. E pri pour meyer lekol ti al pour Plaisance primer.
Ti osi annan pri ki ti donnen baze lo desizyon manm ziri. Pour kategori lapoezi P1-P4, gannyan ti Elle Faure sorti La Misère e pour P4-P6 pri ziri ti al pour Amos Forte lekol Anse Etoile.
Dan kategori zistwar kourt P1-P3, pri ziri ti al pour Chloe Victor sorti lekol Plaisance, e pour P4-P6 pri ti al pour Mary-Anne Belise sorti lekol Anse aux Pins.
E dernyen prezantasyon pri ti dan kategori devlopman resours pour lansennyman ek laprantisaz Lalang Kreol Seselwa par bann ansennyan ki ti al pour sel partisipan sa kategori, Mis Vanessia Labrosse.
Ryan Marengo, ki’n ganny premye pri dan kategori lapoezi P4-P6 i dir ki son poenm i baze lo kovid e ki in partisip dan sa konkour akoz in mazinen ki i ti pou kapab fer en bon poenm.
“Mon manman ek mon papa ti ed mwan ekrir sa poenm. Ti fasil pour mwan ekrir akoz mon ti konn en bon pe keksoz baze lo kovid e mannyer i pe afekte dimoun.
Zoe Faure i dir ki i tre kontan ki son zistwar kourt in ganny premye pozisyon. I eksplike ki son zistwar i baze lo trwa zannimo ki ti abnormal e ki sete son manman ki ti donn li sipor pour ekrir sa zistwar.
Diane Larame