Joseph Sinon i retourn lo lasal avek ‘Gidi Gidi dan Zansiv’ |08 February 2023

Sekans komik pandan performans Dimans

• Lekip i anvizaze fer en lot spektak lafen dimwan

Joseph Sinon ek son lekip komedyen ti Dimans pase lo lasenn Lasal Konferans Enternasyonal pour anviron 3erdtan komedi avek tenm ‘Gidi Gidi dan Zansiv’.

Menm si ti annan selman en santenn dimoun prezan, Msye Sinon ek son group – ki ti konpri Richie B, Brady, Barabas, Najoie Philoe, Vincent Isaac ek Vincent Milius – ti fer en montaz bann sitiasyon lavi toulezour pour egey zot lodyans.

«Dimoun i strese e ti neseser ki nou mont en spektak komedi lo bann problenm toulezour, e sa i enkli aktyalite Sesel e dan lemonn. Nou’n osi adres bann problenm sosyal, bann pti fot, ‘gag’ ki dimoun i fer lo telefonn, bann keksoz ki deroule dan lanterman, ki gou fer riye lo la,» dapre Msye Sinon.

Fodre note ki sa lekip pa’n lo lasenn pour prezant en komedi pandan sa dernyen 3-an e baze lo reaksyon, zot in byen satisfe.

«Pour le moman bann reaksyon i tre pozitiv, sanmenm nou pe ankouraze pour fer en lot tre byento».

Pour sa apremidi ti osi annan performans mizikal par Clive Camille ek Ruben Larue.

Msye Sinon i dir zot in fer piblisite pandan selman kat zour pour sa enn spektak, vi ki zot in ganny konfirmasyon lasal en pe tar. E zot pou revwar sa pour zot prosen spektak ki zot anvizaze fer lafen dimwan.

«Dimoun i anvi detann e i annan gran posibilite nou fer enn le 25 Fevriye,» Msye Sinon i dir avan azoute ki sa dat ava ganny konfirmen plitar, enkli landrwa kot i pou deroule.

Patsy Canaya

Portre: Kontribye