Miss Glam Seychelles 2018 Margaret Zelia Raguin |20 September 2019
Caption : En portre souvenir anler Sans Souci kot ‘View Point’
‘Miss Glam Seychelles’ Margaret Zelia i ofisyelman Madanm Zelia-Raguin
‘Miss Glam Seychelles’, Margaret Zelia, ti fer son larantre devan laport Katedral Imakile Konsepsyon Sanmdi le 14 Septanm pa dan son kouroun konman en larenn labote me dan en rob nouvel marye.
Sa ti dan prezans son bann manm fanmiy ek zanmi.
Margaret Zelia ti ganny kouronnen premye ‘Miss Glam Seychelles’ an Desanm lannen pase kot lotel Berjaya Beau Vallon Bay. Depi son kouronman in angaz li dan bann travay volonter, kot in asiste detrwa sesyon avek Minister Zafer Lanfanmiy. I ti osi fer en donasyon wheel chair avek en zanfan dezabilite e travay konzwentman avek ‘Brother Dude’ pour ed bann madanm ek zanfan ki napa en fwaye.
Pour sa dernyen trwa mwan, Margaret ti okipe avek preparasyon son maryaz. Margaret i en fanm ki’n pas atraver bokou defi dan lavi, me napa nanryen ki’n fer li deroute. Okontrer in for e sirmont tou. Margaret i dir «konman en fanm, lavi pa’n zanmen fasil, i annan de fwa kot mon’n vwar mwan tonbe me mon pran kouraz e releve. Ozordi i en zour ranpli avek lazwa ek lemosyon. Mon Msye Erol Raguin in tre konsansye e donn mwan tou sipor neseser. Konman en larenn labote avek en responsabilite e osi lavi fanmiy e profesyonnel, mon’n esey mon mye pour zwe byen avek mon letan e zwe rol ‘Miss Glam Seychelles’ kan i neseser, zwe rol manman dan lakour e osi kot mon travay konman en ‘principal liaison officer’ kot departman kiltir”.
Seremoni relizye ti swiv par en zoli resepsyon kot lotel Eden Bleu e sete santez morisyenn Laura Beg Ramanisum ki ti ouver lasal avek son sanson ‘l’immensité l’amour’ e Kethy Esparon ti osi zepis li ek son lavwa formidab.
Miss Glam Seychelles 2018, Margaret Zelia, i ofisyelman Madanm Raguin. Direkter Beauty Organisation Seychelles ti osi prezan dan sa levennman e i swet Margaret e Erol bonn sans e tou le meyer dan zot lavi maryaz.
En kontribisyon