Lasanble Nasyonal i anvoy deba lo Kod Sivil pour plitar |20 September 2019
Apre en lot lazournen antye yer pour diskit lo bann diferan lamannman pour moderniz Kod Sivil Sesel, Lasanble Nasyonal in anvoy travay lo sa dokiman enportan pour plitar.
Tar yer apremidi, Spiker Nicholas Prea ti anonse ki ozordi Lasanble Nasyonal pa pe zwenn akoz en lot langazman e piblik pou ganny enformen kan ki travay lo sa dokiman pou repran.
Antretan lazournen yer ti konsantre lo tou sa ki annan pour fer avek zouisans en propriyete ki en dimoun i kapab gannyen, lekel ki kapab donn li e ki mannyer sa i marse. Lezot size ki ti diskite longman ti annan pour fer avek diferan kontansyon otour pye dibwa e sa i swa bann ki lo later leta me ki baliz avek en propriyete prive, bann ki lo balizaz, bann ki menas vwazen, bann pye fri ki pour en vwazen me son fri i tonb kot en lot vwazen e fason pour pli byen adres tou sa bann problenm ki leve akoz tousala.
Lezot size ki ti osi diskite ti konsern right of way, konstriksyon ki blok vi en vwazen e tou bann kalite difikilte ki dimoun dan kominote i rankontre asosye avek sa bann diferan laspe.
Lasanble Nasyonal i ekspekte repran son travay Mardi prosen.