Lazournen Drwa Imen |12 December 2022
ARID i demann tou dimoun pour debout pour zot drwa e ed enn a lot
“Pour konmemor 75enm lanniverser deklarasyon iniversel drwa imen, Lasosiasyon pour Drwa, Demokrasi ek Lenformasyon (ARID) in zwenn ek lemonn pour aport respe pour en imen depi son konsepsyon ziska ki i kit sa lemonn.
“Nou devre konpran ki tou imen in ne ek son drwa e pa okenn dimoun ki donn li sa drwa – ni son paran, ni son ansennyan, ni politisyen e ni menm prezidan en pei.
“Slogan pour sa lannen i ‘Dignite, Laliberte ek Lazistis pour tou’. Alors ARID i demann tou dimoun pour nou debout pour nou drwa e ed enn a lot.
“Pour bann ki santi ki zot in pri e pe sey lager kont represyon e santi ki zot pe ganny eksplwate pour profi lezot, Deklarasyon Drwa Imen Iniversel i aport en kouraz pour zot. Debout pour drwa e lademokrasi ki reprezant bon tradisyon en pei.
“ARID i pran sa loportinite pour osi eksprim konsern lo lenzistis ek inegalite dan laz pansyon pour enn de sitwayen. ARID i konpran ki bann prediksyon finansyer i montre ki si laz pou tous pansyon pa ogmante, sa i poz en risk lo soutenabilite sa fon. Sepandan ARID i fermeman kont sa provizyon legal ki permet serten kategori dimoun ki’n servi dan lofis pour 144 mwan e plis, ganny zot pansyon a laz 55-an tandis ki leres i bezwen esper 65-an. Sa i kree en inegalite e tretman preferansyel pour en kategori dimoun.
“ARID i demande ki lamannman neseser i osi ganny fer pour adres sa provizyon e fer li vin 65-an parey pour tou dimoun.
“ARID i osi siport pozisyon Lasosiasyon pratikan medya (AMPS) kont desizyon pour restrikte zournalis ‘Independent Newspaper' akse dan konferans lapres resaman. Okenn mezir pour target zournalis ou medya e anpes zot fer zot travay i pyetin lo valer e prensip lademokrasi.
“Zournalis i annan en lobligasyon pour travay dan en fason enparsyel, lib e zis, an respektan bann etik ek valer ki gid zot profesyon. Anmenmtan gouvernman i osi annan en devwar pour siport medya e asire ki sitwayen i ganny akse avek lenformasyon e alafen se sitwayen ki pou fer zot prop zizman si en tel zournal i vo lapenn lir, pa gouvernman ki pou desid pour sitwayen.
“ARID i ranforsi lo nesesite pour lepanouisman ek devlopman en lapres lib e endepandan.”
Lasosiasyon pour Drwa, Demokrasi ek Lenformasyon (ARID)