Biro Mer Lavil i satisfe avek premye lafwar festivite Nwel ek lannen |05 December 2022
• Envit piblik pour partisip dan lezot ki pour fer pandan Desanm
En gran nonm dimoun ti lo laveni Lendepandans Sanmdi lazournen pour en lafwar spesyal organize par Biro Mer Lavil pour sa peryod festivite Nwel ek Lannen.
Dapre reprezantan Biro Mer Lavil, Lydia Charlie, sa aktivite, lannmen seremoni alim dekorasyon dan lavil Victoria pour demar festivite, ti sa lannen atir en gran group biznes.
«Sa lannen i vreman bon akoz nou annan 72 partsipan dan diferan kategori depi sa ki vann lenz, dekorasyon lakaz, manze, prodwi labote, ortikiltir ek lagrikiltir e menm travay lar. Alors i en varyete pour tou sa ki pe rod en kado pour sa letan festivite,» Madanm Charlie i dir.
I ti felisit bann biznes ki i dir sa lannen in ekout lapel pour zot met zot ban prodwi an plas aler, e pe respekte bann konsiny ki’n donnen pour ki sa aktivite ki ti ale ziska 6er diswar, i deroul dan lord.
Avek bon lanbyans mete par radyo lokal, SBC, bann biznes ti’n alinyen lo en kote semen Laveni Lendepandans ki vir lo kote Labank Santral.
Georgie Belmont ti enn bann vander avek en seleksyon legim, zepis ek fler. Msye Belmont i dir i abitye partisip dan bann lavant parey.
“In konmans ase dousman, parey i leka toultan, me selman apre i bouze e normalman mon ganny sans vann tou avan lafen lazournen.”
Pour Rodney Eliza, ki ti pe vann bann lobze dekorativ pour lakaz, i ti pe profit sa lafwar pour fer fini son stok apre ki in ferm son laboutik.
“La mon pe vann bann dernyen stok e mon’n redwir bann pri konsiderableman. Serten lobze ki ti R2000 pe ozordi vann R500 e bann ki ti R350 i aprezan R100. I annan lentere par bann kliyan. Mon zis anvi ed dimoun ganny en pti kado pour Nwel.»
E pour sa lakoup mondyal ki pe deroule an se moman, ti annan Richard Souris ki ti pe vann kado pour bann fanatik.
« Nou annan paviyon, ‘bandana’ pour tou lekip, enkli bann kouvertir pour vit loto, alors nou pe fer sir zot ganny en keksoz ki reprezant zot lekip.»
Pour Lucie Clarisse, ki ti pe vann bann prodwi lokal, depi bannann fri, tanmaren ek zi lokal, lavant ti osi pe al byen.
«Pour le moman bannan fri i vann byen, apre gato bannann osi, me selman mon kapab konfirmen ki piblik i apresye prodwi lokal.»
Biro Mer Lavil i rapel piblik ki lavant parey pou kontinyen tou le semenn e pe ankouraz zot pour desann e montre zot sipor. Sa bann aktivite ki pou ale ziska lafen Desanm pe fer an kolaborasyon avek Enterprise Seychelles Agency (Esa).
Patsy Canaya
Portre par Louis Toussaint
