Refleksyon bann peser alokazyon lasemenn dedye a lapes |28 November 2022
Hudson Oreddy
‘Lapes artizanal i en travay ki enteresan me fodre ou annan lanvi e sa lafwa pour fer li’ – Hudson Oreddy (Bougainville)
“Mon’n konmans lapes en bon pe letan. Mon parkour lo lanmer in konmans an 1987 kot mon ti al lo bato ton, apre mon’n al dan lasenn makro e mon’n kontinyen dan diferan domenn dan lapes. Mon’n osi plonze, koule pour rod zourit. Mon’n osi al lo bato longline kot mon’n fer 2-an. Dan bann lannen 1995 koumsa mon’n konmans travay dousman pour mwan menm e mon’n menm pran en loan e travay dousman dousman ziska la konmela.
“I annan 27-an ki mon dan lapes artizanal e mon war i annan son gannyen ek son perdi. Kantmenm delo i kalmi ou ale, ou pa ganny parey ou ti pe ekspekte. I’n toultan mars koumsa. Fodre pa dekouraze.
“Lo lot kote napa ase zenn. Sa ki ou ekspekte e sa ki ou konnen mon ti a kontan en lot dimoun ti a konnen. Mon ti a voudre zot ti a kit sa tradisyon parey dimoun lontan ti fer – parey servi montanny pour detekte landrwa kote pour met kazye dormi. Ou bezwen konnen kote ou pe mete. Ler ou pe lev kazye e napa pwason ou bezwen konnen kot pou al met sa kazye ki ler ou pou vin ankor pour ganny sa pwason.
“I en travay ki enteresan e anmenmtan fodre ou annan lanvi e sa lafwa pour fer li. Pour mwan personnelman, pwason i annan son letan. Lanmer i annan son mare e lalin i zwe en rol. I’n toultan mars koumsa.”
En kontribisyon Lotorite Lapes Sesel