Poet Reuban Lespoir i lans son de premye liv zistwar an kreol |22 November 2022
Msye Lespoir, Msye Bibi ek Msye Bonnelame pe siny kopi sa de liv
Apre ki in lans plizyer liv lo son bann poenm ki in ekrir, poet Reuban Lespoir in lans de premye liv zistwar an kreol.
Sa de liv avek karakter animen byen kolore avek bann gro let, ‘Ani ek Fourmi’ e ‘Degaze David Degaze’, zot form parti son proze ven liv zistwar kreol pour zanfan ki i annan lentansyon prodwir an servan sa ven let alfabet ki ganny servi dan kreol.
Lansman sa de liv ti fer Vandredi apremidi dan oditoryonm Lenstiti Sesel pour Ledikasyon Ansennyan (SITE) Mont Fleuri, dan prezans sekreter prensipal pour servis ledikasyon, Merna Eulentin; sekreter permanan Lenstiti Kiltir, Leritage ek Lar Sesel, Cecile Kalebi; vis sanselye Liniversite Sesel, Joëlle Perreau; manm fanmir; zanfan lekol parmi lezot envite.
Sa lansman ti dan kad Lazournen Iniversel bann Zanfan ki ti yer, Dimans le 20 Novanm.
Liv ‘Ani ek Fourmi’ i en zistwar ki deroul otour en piknik ki Ani ti ale e kot i ti manz ‘sandwich’ kot plitar ler i ti pe detann fourmi ki ti’n ganny atire par loder ‘sandwich’ ti mont lo li partou.
‘Degaze David Degaze’ i rakont zistwar kot sa etidyan ti’n dormi antro kot ni alarm revey i pa’n tande e an sotan en kou an gran in degaze e in mal prepar li pour al lekol kot plitar apre ki i ti’n abiy tou devergonde dan pe degaze i ti aprann ki ti Dimans e non pa Lendi pour li al lekol.
Sa de liv an gro karakter par Reuban, in ganny ilistre par Kenny Bonnelame e mizanpaz par Bartholomew Bibi. Zot in ganny sponsorize par Lenstiti Nasyonal pour Kiltir, Leritaz e Lar Sesel.
Sa de liv zot kout R150 sakenn e anvi ki pour lemoman loter pa ankor rod en landrwa pour met zot anvant, manm piblik ki anvi kopi sa de liv, espesyalman pour fer kado zanfan pour sa moman festivite parmi lezot, pou kapab kontakte loter lo limero 2522557 pour aste zot kopi.
Pandan seremoni Msye Lespoir, Msye Bibi ek Msye Bonnelame ti siny kopi sa de liv kot apre bann kopi ti ganny remet par bann zanfan lafanmir avek serten envite ki ti prezan. Lodyans ti osi ganny sans ekout serten ekstre bann poenm ekrir par Rueban lir par bann zanfan Bling Bling, sa lasosiasyon poetik Seselwa ki li Reuban i apartenir avek. De lezot koleg poet dan lasosiasyon Bling Bling, Stephanie Joubert ek Vincent Milius, ti osi prezant sakenn en morso zot konpozisyon.
Msye Lespoir ti dir ki sa de liv i form par en progranm lektir kreol ki i anvi anmennen dan sistenm ledikasyon konman en lot alternativ pour bann ansennyan ek bann paran.
I ti osi lans en lapel pour ganny enpe fon pour kapab lans bann lezot liv ki dan proze.
I fer remarke ki sa de liv enkli lezot ki i pou lanse dan lavenir pou ed bann zanfan ki annan problenm lektir.
Teks ek portre par Patrick Joubert
