‘Lafoli Lanmour’ en sikse |09 November 2022
• SNYC i remersye piblik pour zot sipor
Konsey Nasyonal Lazenes (SNYC) in dekrir konman en gran sikse son premye aktivite ‘Lafoli Lanmour’ Sanmdi, kot zenn ti ganny ankouraze pour senm lanmour atraver fer bann aksyon pozitiv e avek konpasyon dan plizyer landrwa dan rezyon santral lo Mahé.
Sa levennman i form parti progranm lo Valer Nasyonal, e son lobzektif se pour promouvwar diferan valer pozitiv atraver sa bann tel aksyon.
I ti vwar partisipasyon en pe plis ki 160 zenn sorti dan group Young Citizens, etidyan lekol Plaisance, Mont Fleuri, English River, Belonie, Beau Vallon ek Perseverance, zenn zofisye lapolis, group ladans ‘Diamond Dancing Troupe’, benn lazenes SNYC avek sipor zofisye Young Citizens ek SNYC, radyo PureFM, Radio Sesel ek Paradise FM, Konsey Nasyonal pour Zanfan.
Zot ti’n stasyonnen dan diferan landrwa ki enkli Lari Bazar, Orion Mall, STC Hypermarket e kot bazar Roche Caiman pour distribye lenformasyon lo valer ensi ed bann dimoun avek zot sak konmisyon. Sa enn aktivite ti apel ‘Azout Disel’.
Sa bann zenn ti osi partaz bann ‘flyers’ ek ‘bookmark’ avek mo lankourazman e bon swe. En lot group zenn ti eksprim zot lekor atraver performans ladans kot diferan lokasyon enkli Lari Bazar, kot terminal bis, Hypermarket ek kot lapos, ensi ki benn lazenes ki ti pe performen kot terminal bis.
Swivan sa aktivite ki dapre SNYC in planifye ase vit, zot satisfe avek lakantite zenn ensi ki reaksyon piblik.
Zofisye sinyor lazenes dan seksyon Youth Empowerment and Wellbeing, ki responsab progranm valer, Marylia Dorlin, i dir sa bann reaksyon pozitiv i ankourazan akoz bann zenn in vreman met zot leker e tou zefor ladan.
“Sa bann zes par bann manrmay in byen ganny apresye par manm piblik ki’n dir zot swete sa i fer enpe pli souvan, akoz i anmenn bokou soutyen ek lape pour zot, e zot kontan pour vwar bann zenn pe aport sa bann bon valer kot zot, e fer bon zes anver zot.”
En lot aktivite ki ti vwar bon partisipasyon i ‘Senm Lanmour’ ki ti ankouraz manm piblik pour anmar en riban konman en siny lanmour ek lespwar avek en lasenn e montre zot langazman anver mentenir e promouvwar bann bon valer.
Dan sa enn ki ti pe deroul devan lapos e dan Lari Bazar, piblik ti osi ganny demande pour fer en kontribisyon ki pou donnen avek en zenn avek dezabilite pandan peryod Nwel. SNYC i dir sa enn osi ti byen apresye par piblik, kot plis ki 300 endividi enkli bann zenn zot menm ti partisipe.
Nou seleksyon portre i montre enn de moman for sa aktivite Sanmdi.
Patsy Canaya
