Konkour enter-skoler ‘Moman Kreativite’ 2022 |08 November 2022
Bann gannyan dan en portre souvenir avek envite apre ki zot ti’n ganny rekonpanse
Bann gannyan i resevwar zot pri
Etidyan lekol primer, segonder ek pos-segonder ki ti pran par dan diferan kategori konkour ‘Moman Kreativite’, in resevwar zot pri dan en bref seremoni ki ti deroul kot Teat Nasyonal, Mont Fleuri.
Bann pri ti dan kategori sanson, zistwar, teat, ladans, meyer akter/aktres, meyer lekol e meyer parmi lemeyer.
Pri pour meyer lekol primer ek segonder ti al pour lekol Beau Vallon e pos-segonder ti al pour Lakademi Letid Biznes Sesel (SBSA).
Meyer aktres pour primer ti Grace Nesta sorti lekol Mont Fleuri e meyer akter dan sa menm kategori ti Rami Nanon sorti Beau Vallon.
Pour segonder meyer aktres ti Rhy-Anne Vel (Beau Vallon) e meyer akter ti Rahim Jeannie (Plaisance)
Pour pos-segonder pri pour meyer aktres ek akter ti al pour Anee Kit (SBSA) ek Fabien Jeanne (SITE).
Hushna Margrite ti resevwar en pri spesyal.
Lezot pri ti konm swivan: Pri pour sanson dan kategori primer ti al pour lekol La Digue; segonder pour Plaisance e pour pos-segonder SIT.
Pri pour zistwar ti al pour Pointe Larue dan kategori primer; Perseverance pour segonder e SBSA pour pos-segonder.
Pri pour teat ti al pour lekol Beau Vallon dan kategori primer; Beau Vallon pour segonder e SBSA pour pos-segonder.
Pri pour ladans ti al pour lekol Anse Boileau dan kategori primer; Plaisance pour segonder e lekol NIHSS pour pos-segonder.
Ti osi annan prezantasyon meday e en pti kado sponsorize par H Savy Insurance.
Pandan seremoni, ti osi annan performans rakont zistwar, ladans tradisyonnel ek sanson kreol par bann zanfan ek zenn.
‘Moman Kreativite’ i en lokazyon spesyal pour bann etidyan, gran ek pti, pour ganny plis bataz pour montre zot talan artistik. I en moman kot bann fitir akter, santer, danser, santer, mizisyen ek rakonter i ganny dekouver e ganny sans fer zot premye pa lo lasenn artistik.
Sa prezantasyon ti deroul dan prezans sekreter prensipal pour Kiltir Cecile Kalebi e sekreter prensipal ledikasyon Merna Eulentin, parmi lezot o zofisye dan sa de minister.
Vidya Gappy
Portre: Louis Toussaint
