Mesaz Sekreter Zeneral Lenstiti Nasyonal pour Kiltir, Leritaz ek Lar, Msye David Andre, alokazyon Lazournen Enternasyonal Lalang Kreol |28 October 2022
‘Annou valoriz nou kreolite’
“Annou valoriz nou kreolite e profite pour servi li pour ofer bann nouvo servis ek prodwi, pour atir nou bann viziter.”
Sa i form parti mesaz sekreter zeneral Lenstiti Nasyonal pour Kiltir, Leritaz ek Lar, Msye David Andre, alokazyon Lazournen Enternasyonal Lalang Kreol ki ganny selebre le 28 Oktob sak lannen.
Mesaz entegral Msye Andre i lir koumsa:
“Mwan Oktob pou reste parmi enn bann mwan pli enportan pour nou nasyon Seselwa konman en pep Kreol. Sa mwan i sa letan kot konman en nasyon Kreol, nou zwenn ansanm pour selebre e manifeste sa ki pli fondamantal pour nou, e sa se nou kiltir Kreol. En kiltir avek diferan ras melanze, ki fer nou sa pep inik omonn.
“Nou kreolite i enkli tou dimounn, pe enport ras, kouler, lorizin, stati sosyal ou ekonomik. Napa eksklizyon dan nou kreolite, me i annan en linite ki anmenn nou tou ansanm. Se sa lafors ki permet nou zwe en rol egzanpler parmi lakominote Kreolofonn e lemonn antye.
“Nou Kiltir Kreol i form en gran parti nou lavi toulezour. I enfliyans nou fason panse, nou lespwar, nou lwayote, nou lafyerte, e i donn nou en sans lapartenans dan nou kominote e nou sosyete. Nou kiltir i sa moter ki fer nou aprann kote nou sorti, kote nou ete e kote nou anvi ale, parey nou logo Festival Kreol i fer resorti, ‘En lizye lo lepase, En lizye lo lavenir’.
“I annan bokou pour redekouver dan nou kiltir kreol. Se nou langaz Kreol ki ed nou form nou bann premye mo depi nou lanfans. Se nou bann tradisyon kiltirel ki donn nou bann bon valer moral e fer nou vin bann sitwayen responsab. Nou bann pla ek reset manze kreol i demontre larises e fri nou lanmer ek later, san bliy nou lanmizik ek ladans, ki kontinyelman demontre nou talan e anrisi nou repertwar kiltirel. Annou valoriz sa bann atou e profite pour servi nou kreolite pour ofer bann nouvo servis ek prodwi, pour atir nou bann viziter.
“Prezervasyon, promosyon ek transmisyon nou kiltir i devret responsabilite tou Seselwa. Mazinen ki nou kiltir i sa lalimyer nou pase ki dan nou lanmen ozordi, pour permet nou ekler nou lavenir.
“Bonn Fet Kreol zot tou.”
David Andre
Sekreter zeneral Lenstiti Nasyonal pour Kiltir, Leritaz ek Lar