Follow us on:

Facebook Twitter LinkedIn YouTube

Entertainment

Auspitious i lans albonm ‘Segonn Natir’ |24 October 2022

Auspitious i lans albonm ‘Segonn Natir’

Santer reggae Auspitious in resaman lans son dezyenm albonm titre ‘Segonn Natir’, en travay ki konpri 19 sanson e ki ti ofisyelman lanse Vandredi le 14 Oktob.

Sa travay ki swiv son premye albonm ‘Demontre sa ki ou merite’ an 2019 i, parey bokou pou ekspekte, annan plis bann morso reggae, avek ennde bann lezot zanr lanmizik tel ki zouk, akoustik, dancehall ek blues parmi lezot.

Pandan sa de lannen ki i pa ti pe travay lo sa enn albonm, in en letan parfe pour li fer resers e eksperimante konman en artis, e sa in ed li pour devlope dan diferan sans. Auspitious i dir ki ‘Segonn Natir’ i bokou pli ris an term parol, konpozisyon, melodi, e an zeneral, ki son premye albonm. I ti konmans travay lo la depi Mars 2021.

“’Segonn Natir’ i montre sa progresyon depi mon premye travay. I’n annan en bonpe matirite dan mon devlopman artistik, e mon’n fer konteni pour en lodyans pli matir. In sirpas mon lekspektasyon tou,” Auspitious i dir.

Menm si zot in travay ansanm lo bann kolaborasyon oparavan, sa albonm i premye fwa ki i travay avek artis Ion Kid lo en proze mazer. Annefe, sa albonm in prodwi e rikorde an antye kot studio Ion Kid, e par Ion Kid limenm.

Serten mizisyen ki’n osi kontribye zot talan ek leksperyans anver sa albonm i enkli Ralph Cecile lo tanbour, Tony Julie lo bas, Jonathan Alvis lo keyboard, e Eric Payet lo gitar lakonpannyman.

Sours lenspirasyon pour sa bann sanson i tre varye dapre Auspitious, avek serten morso ki baze lo bann sitiasyon lavi toulezour tel ki lanmour ek pozitivite, osi byen ki bann sitiasyon konsernan, bann tranzisyon dan ki pei pe pase e bann moman difisil, tel ki sa pandemi Covid. I osi abord bann topik senp, avek bi fer lodyans apresye bann pti plezir e senp keksoz ki fer lavi enteresan.

Albonm i live, e annan en bonpe laspe konser, alors Auspitious pe fer plan pour fer en seri konser lot lannen.

“Pour fer sa albonm, mon’n bezwen an konpetisyon avek mon premye albonm. Mon’n an konpetisyon dan sans ki mon’n vwar kot mon’n al byen e kot mon’n al mal, e mon tre satisfe akoz mon pa sir si mon pou ganny sans fer en albonm koumsa ankor,” Auspitious i azoute.

Tit pour albonm i’n enspire par plizyer keksoz, espesyalman vi ki nimero de i annan en gran lenportans e sinifikasyon dan lavi Auspitious, ki dezyenm garson dan son fanmiy. An plis, son garson e band i selebre 2-an sa lannen, osi byen ki lefe ki sa i son dezyenm albonm. Lo albonm i osi annan en morso ki titre ‘Segonn Natir’.

En morso lo sa albonm, ‘Fini Abitye’, ti sorti an Zen konman en avangou, menm si albonm antye pa ti ankor pare. Serten lezot sanson lo albonm in fini ganny mete lo radyo osi.

Trwa artis local – Champion, Elijah e Big 1 – in kolabor avek Auspitious lo sa albonm, osi byen ki en artis enternasyonal Trisha, enn bann santez ki akonpanny artis reggae tre renonmen dan lemonn Gentleman. En lot kolaborasyon avek artis Morisyen Blakkayo ti’n osi organize pour sa albonm, me malerezman, sa morso pa’n pare atan pour lansman albonm, menm si i ekspekte lanse pli tar.

‘Segonn Natir’ i disponib lo CD, e pou osi disponib lo bann platform nimerik byento. Auspitious avek son tim, ki konpri Manager Sam Payet, in deside pour sanz stratezi e pa fer li disponib lo USB, vi ki i pli fasil pour kopi e fer piratri, me, pe plito fer bann CD baze lo demann, ki depi zour in lanse i pe byen ganny resevwar.

Auspitious pe fer tou zefor pour al zwenn son bann fans personnelman letan ki zot anvi en albonm, kot i al anmenn son travay kot zot limenm, ki osi en loportinite pour zot tir en pti portre avek li, e enterakte osi.

Albonm i osi disponib Kot Alix lo Mahé, e pou byento disponib lo Praslin ek La Digue.

Apre ki in resaman fer son premye tour dan rezyon, avek en performans Rodrig ek Moris, Auspitious pe osi fer plan pour lans son albonm Moris dan fitir.

Parmi bann kontribiter ki’n ede pour fer sa travay i Nicholas Louys, Nigel Ally, Paradise Media, osi byen ki Konsey Nasyonal pour Lar ek Artizana (NACC).

 

Laura Pillay

More news