Festival Kreol   Popilarite ‘Moman Kreativite’ i touzour for |17 October 2022

‘Moman Kreativite’ – sa levennman dan kad Festival Kreol ki permet zenn dan bann lekol atraver pei demontre zot kreativite ek talan artistic – ti fer son retour sa wikenn, apre 2-an labsans akoz pandemi Covid-19.

Vi ki sa levennman animasyon in toultan enn bann aktivite prefere manm piblik lo progranm Festival Kreol, pa ti drol alor ki konpetisyon antre bann zenn dan lekol primer, segonder ek pos-segoder ti deroul dan en sant konferans enternasyonal (ICCS) deborde kot piblik pa ti manke pour vin vwar e apresye diferan talan atraver ladans, sanson, zistwar, pyes teat, kont animen ek lezot form lar ki sa bann zenn ti pe demontre.

Sa voyaz, bann zenn in fer sorti bokou mesaz, sirtou atraver bann pyes teat, pour manm piblik reflesir lola.

Dapre kordinater sa levennman, Norbert Dogley, tou bann meyer dan sak kategori ladans, sanson, zistwar, pyes teat, kont animen parmi lezot ki’n ganny performen pandan sa wikenn ki fek pase, pou aparet dan en lot spektak ki pou fer Sanmdi ek Dimans apremidi sa wikenn ki vini, ankor kot sant konferans enternasyonal anvil, kot bann gran venker pour sak kategori pou ganny swazir.

Nou seleksyon portre i montre enn de moman for sa aktivitie pandan wikenn ki fek pase.

Teks ek portre par Patrick Joubert