24 fanmir i resevwar lakle zot nouvo lakaz   Patrick Joubert |15 October 2022

Vennkat (24) fanmir ti yer apremidi resevwar lakle zot nouvo lakaz dan Vilaz Zanblon, en nouvo vilaz ki’n fek ganny konstrir dan distrik Cascade.

Sete Prezidan Wavel Ramkalawan ek Minis pour Later ek Lakaz, Billy Rangasamy, ki ti ganny loner pour devwal plak e ofisyelman ouver sa vilaz.

Sa ti dan en seremoni ki ti fer dan prezans Vis-Prezidan Ahmed Afif, Minis Dezinyen Jean-François Ferrari, lezot minis, manm Lasanble Nasyonal, sekreter prensipal, sef egzekitif, lotorite distrik Cascade, bann nouvo zabitan, zanfan lekol Cascade, bann travayer Minister Later ek Lakaz parmi lezot envite.

Vilaz Zanblon, ki kot Kan Gard Petit Paris, i konpri 24 younit lakaz kot parmi 16 younit i bann ki trwa (3) lasanm dan en blok kat (4) letaz depi ater e wit (8) younit ki bann de (2) lasanm dan en blok trwa (3) letaz depi ater. Sa bann younit lakaz ti ganny konstrir par Allied Builders (Pty) Ltd pour en sonm 38.56 million roupi ki ladan pa enkli kou pour tretman desarz.

Sa proze, ki ti konmanse an Out 2019, ti terminen an Septanm sa lannen.

Minis Rangasamy, manm elekte pour distrik Cascade Philip Monthy, e ladministrater distrik Bergita Aglae ti parmi bann ki ti prezant bann nouvo lokater avek zot lakle.

Sa louvertir ti dan kad aktivite Lasemenn Labita an relasyon avek lazournen mondyal pour labita ki ti selebre le 3 Oktob anba tenm ‘Mind the Gap. Leave No One and No Place Behind’.

Sete Per Jacques Herilala sorti dan parwas Anse Boileau ki ti beni sa vilaz ki ekipe avek en pti zarden zwe pour zanfan.

Dan sa 24 younit, 20 in ganny donnen avek zabitan Cascade e sa kat lezot avek bann sorti andeor.

Dan son ladres, Minis Rangasamy ti dir ki plan son minister se pour fer sir ki personn pa ganny kit deryer kot lozman i konsernen, ki zot reste dan lanplwa, ki zot planifye byen zot fanmir e ki zot pey byen zot loan lakaz. 

I ti note ki pa zis konstrir batiman ki pou rezourd problenm lakaz, me tout en lansanm ledikasyon bon vwazinaz, bon konportman familyal, bon lapartenans ek lapresiasyon bann lenvestisman ki ganny met a zot dispozisyon, i parmi bann solisyon.

Minis ti azoute ki gouvernman i reste touzour angaze pour vin avek bann solisyon pour lakaz, avek led bann pei zanmi, pour soulaz bann ki dan bezwen.

I ti dir ki, dan sa menm vilaz, konstriksyon en lot 24 younit lakaz pou konmanse boner lannen prosen dan en proze 58 younit lakaz abordab ki pou ganny fer par faz dan menm landrwa.

I ti osi dir ki lannen prosen, en proze 32 younit ‘mid-range condos’ pour bann profesyonnel pou osi demare enpe pli o anler kot ansyen masin koltar ti ete e sa pou termin an 2024.

I ti mansyonnen ki gouvernman pe al kontinyen avek en proze 40 younit dan distrik Grand Anse Mahé, en lot proze 12 younit ki pou ganny fer dan distrik Glacis finanse par gouvernman Qatar, parmi lezot led ki gouvernman Sesel pe osi rode avek gouvernman Arabi Saoudi pour finans proze lakaz dan pei.

I ti demann bann nouvo zabitan pour fer zot vilaz vin enn ki egzanpler pour lezot.

Lo lapar bann zabitan, Sofia Aglaé ti remersye tou bann ki’n zwe en rol ki’n fer ki sa proze in en sikse pour zot kapab benefisye.

I ti demann son bann koleg vwazen pour fer sa vilaz vin enn kot i ava gou pour reste.

Pandan seremomi, ti annan animasyon par lakoral minister ek bann zanfan lekol Cascade.

De zabitan ‒ Jean-Paul Ernesta ek Anifa Morgan ‒ ti ganny loner ansanm avek Onorab Monthy ek ladministrater distrik Aglaé pour plant de pye fri dan kad lanbelisman sa vilaz.

Tou ti fini avek en letour dan bann younit e otour vilaz.

En zabitan Cascade, Anielle Malvina ki’n ganny en younit trwa lasanm, ti dir ki i byen kontan ki finalman in ganny en lakaz dan son distrik prefere, e ki i ti pe espere ansanm avek son msye Holbert Malvina ek son trwa zanfan. 

I ti rakonte ki zot ti pe reste tanporerman dan distrik Ile Persévérance pandan sa dernyen 3-an apre ki zot ti ganny transfer sorti anler dan leo Cascade kot ti annan 500 mars peron ki zot in bezwen monte pour plizyer lannen.

I ti dir ki zot ti anvi en landrwa pli konvenab pour benefis enn son ser ki annan en problenm fizik e ki reste avek zot.  

Nou seleksyon portre i montre serten bann moman for sa seremoni.

 Portre par Patrick Joubert