Follow us on:

Facebook Twitter LinkedIn YouTube

Education

Lekol La Retraite i selebre lazournen ansennyan |08 October 2022

Lekol La Retraite i selebre lazournen ansennyan

Dan kad lazournen bann ansennyan, lekol La Retraite ti organiz en lasanble spesyal yer bomaten ranpli avek animasyon par bann zanfan pour onor bann ansennyan kot sa lekol.

Sa lasanble spesyal ti konmans avek en refleksyon par group spirityel sa lekol, apiye par bann zanfan ek Paster Yves Aglae sorti kot legliz Pentecostal.

Sa ti swiv par diferan performans ek animasyon par bann zanfan lakres ziska P6 ki ti enkli sanson, ladans, poenm, defile lanmod, bann pti mizansenn, parmi lezot.

De partener e zanmi sa lekol – Mervin Mathieu, ki ti fer en baraz an servan materyo resiklaz e lakonpannyen konstriksyon Laxmanbhai k’in ede avek bann pti proze renovasyon – ti osi resevwar en pti tokenn lapresiasyon pour zot led ki zot in donnen.

Dan son ladres pour bann ansennyan, mis ansarz, Gina Ernesta, ti remersye zot pour ede dan sikse bann etidyan par sanz zot personalite pour fer zot vin bann bon sitwayen. Vi ki zot la pour enspir bann zanfan, i ti osi demann zot pour kontinyen fer resers e kontinyen aprann pour avans devan dan zot profesyon pour anmenn sikse pour zot bann zanfan.

Sa lazournen ansennyan ti termin avek en pti fonksyon antre zot kot lekol menm.

Apard bann ansennyan ek bann zanfan, osi prezan ti manm komite paran ansennyan, komite konsey ek bann paran.

Nou seleksyon portre i montre en pe lanbyans pandan seremoni kot lekol La Retraite pour onor bann ansennyan.

 

Teks ek portre par Patrick Joubert

More news