37enm Festival Kreol Lafis ek progranm i ganny devwale ● Biznes ek endividi pe ganny demande pour siport sa aktivite |07 October 2022
Nouvo lafis Festival Kreol
Trannsetyenm edisyon Festival Kreol in ofisyelman lanse yer avek devwalman lafis ek en progranm sarze ki konmanse demen, Sanmdi le 8 Oktob, avek ‘Lansman Lasezon Kreol’ lo lans Beau Vallon, e termin avek Bal Bobes le 31 Oktob.
Sa ti pandan en konferans lapres kot Sant Konferans Enternasyonal, dirize par tyermenn komite Festival Kreol, Msye Emmanuel D’Offay, ki osi direkter egzekitif Lazans Kreativ Sesel ; Cecile Kalebi, ki vis-tyermenn e direktris pour levennman, Margaret Raguin.
Msye D’Offay i dir ki sa lannen komite in oule anmenn bann aktivite ki sak Seselwa, depi sa ki pli pti ziska pli aze, i ava santi li fyer, e vwar li dan omwen enn sa bann aktivite.
Aktivite ki al pandan en mwan, pe organize an kolaborasyon avek Minister Ledikasyon, departman gouvernman lokal, departman lazenes, Lenstiti Lar e konsepsyon lide (SIAD) e plizyer lasosyasyon ki promouvwar kiltir ek tradisyon Kreol Seselwa.
Piblik pou kapab vwar legzibisyon ‘Lidantite Kreol’, performans mizikal dan kapital lemonn kreolofonn, Victoria, Moman Kreativite, Bazar Kreol, Zenn Artis Kreolofonn, Pri Konkour Regina Melanie, e Fon Lanmal.
Pou osi annan Lansman Databes Foklor Sesel par Liniversite Sesel e Salon Savwar Lengwistik e Kiltirel kot Sant Konferans Enternasyonal ki pou al pandan de zour.
Msye D’Offay in lans lapel avek tou Seselwa pour partisip dan sa bann aktivite ki i dir «i anmenn en souf toulezan pour nou dimoun. Festival Kreol i anmenn en moman refleksyon, patriotizm, en kantite benefis endirek dan lekonomi pei».
Komite Festival Kreol in osi demande ki i annan en refleksyon apre sa 37enm edisyon pour vwar kote sa festival i ete e si i pe atenn son bann lobzektif, ki lefe i annan lo lepep Seselwa, ensi ki kapab fer pour amelyor sa selebrasyon.
«Victoria ti nonmen enternasyonalman konman kapital kreol, me eski Victoria in reflekte sa lanbyans ? Eski nou bezwen re-entrodwir bann valer pour fer Victoria vin kapital Kreol non pa zis pandan Festival Kreol me tou dilon lannen ?»
Sa lannen osi komite pe met bokou lanfaz lo bann zenn artis prometan pour zot apre pran labar avek sa ki’n la pe organiz aktivite pour plizyer deseni.
Yer ti osi annan devwalman lafis pour sa enn edisyon, fer par artis tre renonmen Urny Mathiot. Msye Mathiot i dir in oule montre en latmosfer otantik avek en fanmiy kreol ki montre tou diferan ras ek kouler kot lorizin pep Kreol Seselwa i sorti. I eksplike ki lafis i osi montre bann diferan aktivite ki pou pe deroule pandan Festival Kreol ki enkli Fon Lanmal, zwe tradisyonnel e Tifin, e mesaz se ki «lepase i touzour prezan».
I ti osi remersye fotografer Marsha Dine ki’n travay avek li lo sa lafis.
Sa lannen komite Festival Kreol i annan 1.5 milyon roupi pour finans bann aktivite e in remersye son parterner ofisyel, lakonpannyen Cable & Wireless (Seychelles) Limited ki’n ofer en tyek 100,000 roupi pour al ver deroulman bann levennman.
Se sekreter prensipal pour Lenstiti pour Kiltir ek Lar, Manmzel Cecile Kalebi, ki osi vis-tyermenn Komite Festival Kreol, ki ti aksepte tyek avek reprezantan Cable & Wireless (Seychelles), Karine Hoareau ki zofisye pour levennman, demann pour lasistans e relasyon piblik (events and sponsorship PR executive).
Msye D’Offay i dir bidze i reste enn bann kontrent, e la komite in lans lapel avek biznes ek endividi pour vin devan e siport sa aktivite, pour ede fer li en sikse.
«Annou vin propriyeter Festival Kreol akoz i pour nou,» Msye D’Offay i dir.
Piblik pou kapab partisip dan lansman Lasezon Kreol sa Sanmdi lo lans Beau Vallon pour vwar larive peser avek zot pwason, abor en pirog, ladans tradisyonnel bor lanmer, ensi ki moutya. Sa enn aktivite par Fondasyon Kiltirel Seselwa pe fer an partenarya avek Beach Shak.
Patsy Canaya
