Festival Kreol 2022 ‘Lafis Festival Kreol 2022 i demontre lafors ek kapasite artis lokal’ |07 October 2022
Msye Mathiot avek son lafis
Komite Festival Kreol in devwal nouvo lafis pour 37enm edisyon sa levennman ki’n konmanse depi Lendi 3 Oktob e pou ale ziska Lendi 31 Oktob.
Sa lafis ti ganny devwale par son kreater, artis renonmen Urny Mathiot, pandan en konferans lapres yer kot Sant Konferans Enternasyonal.
Msye Mathiot in dir ki son konsep sete pour anmenn en fanmiy kreol avek tou ras ek kouler kot nou sorti e vwar sa latmosfer otantik.
I ti azoute ki sa travay i demontre bann diferan aktivite dan kad sa Festival Kreol tel ki lanmes kreol ek Fon Lanmal, e menm Batenm poupet.
«Sa lafis i demontre lafors ek kapasite artis lokal ki kapab montre zot talan, kapabilite ek leksperyans,» i dir.
«Nou vwar ki artis i kapab prodwi bann travay ki alaoter e lo menm nivo bann artis enternasyonal. Artis lokal i vreman annan talan e mwan mon'n ganny sa loportinite ki mon'n servi e mon'n prouve ki mon kapab delivre konman en artis lokal.»
Msye Mathiot in osi remersye fotografer Marsha Dine ki'n osi travay lo sa proze.
Mandy Bertin