Kominike Lapolis |01 September 2022
En zonm i ganny sarze pour kas lakaz e vole
En zonm 33-an sorti Mont Buxton in formelman ganny sarze devan Lakour Mazistra Anse Royale Mardi bomaten pour lofans kas lakaz e vole ki ti ganny raporte avek lapolis le 24 Out 2022.
Sa ti apre ki en lakaz ti’n ganny kase Anse Soleil dan distrik Baie Lazare kot plizyer propriyete personnel ti’n ganny vole.
Mazistra in ordonnen ki sa aprezan akize i ganny rimann prizon Montagne Posée ziska le 12 Septanm 2022 kot i ekspekte repas ankour. Antretan lapolis i kontinyen avek zot lanket dan sa enn ka.
*****
En zonm i sibir plizyer blesir swivan en aksidan
En zonm 23-an sorti La Gogue ti ganny transporte Lopital Sesel tar yer apremidi pour swen medikal apre resevwar blesir lo diferan parti son lekor anrezilta en aksidan Cascade.
Lapolis ti ganny alerte lo sa aksidan ver 4er13 apremidi. En lanket in konmanse dan sa ka pour kapab etabli sirkonstans otour sa aksidan ki’n arive dan zanmerant larantre flat St Andre.
Rapor preliminer ki lapolis in ranmase sete en kolizyon ant en scooter ek en loto ki ti pe fer direksyon erport a sa moman.
Kominike sorti kot departman lapolis