Lakres 2enm lannen Anse Boileau i organiz en legzibisyon lo tenm ‘laferm’ |06 August 2022

Ky-Mani Legaie, gran gannyan sa konpetisyon, avek son laferm (portre adrwat)

• Plizyer zanfan i ganny rekonpanse pour zot travay, pri meyer laferm i al pour Ky-Mani Legaie

Ti dan en latmosfer plen avek leksitasyon ki lakres 2enm lannen lekol Anse Boileau ti lans son legzibisyon lo tenm ‘laferm’ Zedi bomaten dan prezans bann zanfan osi byen ki paran ek ansennyan.

Pandan sa legzibisyon bann zanfan ki zot proze laferm ti’n ganny zize pli meyer ti ganny rekonpanse e sete Ky-Mani Legaie ki ti ranport gran pri.

I annan antou 51 zanfan dezyenm lannen lakres ki ti partisip dan sa legzibisyon.

Sa bann diferan kalite laferm ki bann zanfan ti’n vin avek ti swa an form desen osi byen ki bann montaz laferm avek zannimo, pye fri ek legim e osi lezot pti plant ki labitid ou pou vwar lo en laferm e kot sakenn ti’n plase dan son landrwa spesifik.

Antou nef zanfan ti ganny pri pour zot laferm. Prezan pour louvertir e pour vwar sa legzibisyon ti bann zanfan, ansennyan e osi bann paran.

Lekol Anse Boileau primer i annan trwa laklas lakres 2enm lannen. Dan sak laklas trwa zanfan ti ganny sertifika pour premye plas, dezyenm plas e osi trwazyenm plas. Sete manm management, ansennyan e asistan ansennyan sa lekol ki ti donn sertifika sa bann zanfan.

Ky-Mani Legaie, apre ki i ti’n ganny premye plas pour son laklas, ti osi resevwar en sertifika pour zanfan ki’n ganny plis pwen pour son montaz laferm.

“Mon kontan mon’n fer byen, mon manman ti desinen mwan, mon ti penn apre kole.”

“Mon santi mwan fyer ki Ky-Mani in resevwar sa pri meyer montaz pour son proze. I montre nou lenerzi ki nou’n mete dan sa proze… Ler Ky-Mani ti ariv dan lakour pour dir nou i annan sa proze, nou ti demann li ki i ti a kontan fer, lanmenm ler nou ti konmans fer montaz sa laferm. Nou’n servi bann keksoz ki ti annan kot lakour menm e nou ti aste zis bann zannimo,” Tracy Monthy, manman Ky-Mani, ti fer resorti.

Tyler Lucas li i ti ganny premye pri pour son laklas. Son manman Gretel Lucas, byen emosyonnel, ti dir avek zournal Seychelles NATION ki i pa ti pe ekspekte en tel pri.

“Akoz mon garson i annan Down syndrome, in pran mwan avek li en bon pe letan pour kapab fer sa proze ansanm. Lezot manm lafanmir in osi ede pour kapab fer montaz son laferm e sa i enkli mon manman ki son carer ki reste avek li kot lekol e osi ansyennan ki’n ed li pour kapab ganny sa sikse ozordi,” Madanm Lucas ti dir.

I’n osi ankouraz bann paran ki zot zanfan i annan menm ou lezot kondisyon lasante parey Tyler, pour partisip dan bann aktivite lekol ansanm avek zot zanfan.

“Pa les zot zanfan ganny kit deryer, partisip dan bann aktivite, menm si parler i pran bokou lenerzi, nou bezwen annan pasyans pour travay avek zot. I pa fasil me get Tyler ozordi in ganny en pri,” Madanm Lucas ti fer resorti.

Ansennyan ansarz pour premye ek dezyenm lannen kot sa lakres, Cecile Monthy, i dir ki bi sa legzibisyon sete pour ranforsi lo sa tenm laferm ki bann zanfan in aprann pandan trimes.

“Ozordi, sa legzibisyon i montre sa ki zanfan in aprann e ki mannyer zot in met li an pratik. Mon tre satisfe avek travay bann zanfan, i en travay ki’n desot mon lekspektasyon. Lekzibisyon i ranpli avek kouler, e zanfan i byen eksite, zis domaz ozordi nou pa’n kapab enkli tou zanfan dan sa seremoni donn pri, akoz konstrent lespas,” Madanm Monthy i dir.

Letan i ti adres tou bann ki ti prezan kot sa levennman, direktris lekol Anse Boileau primer, Sultane Jaqueline, ti remersye bann paran, zanfan ek ansennyan ki’n travay ansanm pour fer sa legzibisyon en sikse.

“Ozordi nou pe selebre en travay konzwent ant lekol avek paran, i montre nou ki menm si zanfan zot ankor pti zot kapab fer en kantite keksoz. Enteraksyon avek zot laprantisaz, enteraksyon kot zot pe touse, lir, koze e sa zot in anmenn li dan lakour kot zot in konmans sa proze lo laferm,” i ti dir.

Mis Jacqueline i dir ki ‘Laferm’ i en tenm ki zanfan i aprann dan lakres e pour sa zot ti fer plizyer vizit pour konn plis lo sa tenm.

“Zot ti al vizit laferm e ozordi sa i fri travay ki zot in fer avek zot paran. Mon tre fyer pour bann paran. E ozordi nou vwar diferan kalite laferm ki paran avek zot zanfan in monte dan lakour. Sa i en keksoz ki nou pe ankouraze pour vwar kot paran, zanfan ek ansennyan pe travay ansanm.”

Depite pour letid kot sa lekol, Elvis Alphonse, i dir ki depi Lendi sa semenn, travay sa bann zanfan in ganny met dan staff room e bann paran enkli lezot zanfan dan lezot laklas in osi kapab vwar e apresye sa legzibisyon.

“Osi pandan sa semenn nou’n annan bann ziri ki’n pase pour vin vwar ki mannyer bann zanfan in travay pour fer li dan en pti konpetisyon. Nou’n annan bann manm ziri ki form parti management lekol, lezot ansennyan ek paran ki’n pase pour ziz travay sa bann zanfan. Sak laklas in ganny zize endividyelman.

“Bann kriter ki’n ganny servi i en pti pe lo zot kreativite, nouvo lide ki zot in vin avek. Nou’n ziz en pti pe lo varyete zannimo, ensi ki bann lezot keksoz ki deroule lo laferm, e apre en pti pe lorganizasyon – kimannyer zot in organiz laferm an servan diferan lobze oubyen materyo resiklaz,” Msye Alphonse i dir.

Sa aktivite ti termin avek en sanson avek tit ‘Lo laferm Msye Matiren’ kot bann zanfan ti sante e mim aksyon diferan zannimo lo laferm.

Fatimih Renaud

Portre par Joena Meme

Bann gannyan lo diferan nivo lakres

Crèche Year 2 (1)

1. Ky-Mani Legaie

2. Emiliano Isnard

3. Male Hetti Achillage

Crèche Year 2 (2)

1. Iliah Rabat

2. Riah Ah-Kon

3. Caiden Camille