En zonm 30-an, en garson 14-an i ganny sarze pour lofans kase e vole dan lakaz |05 August 2022

Lapolis in raporte ki en zonm 30-an ansanm avek en garson 14-an in ganny sarze pour lofans kase e vole dan lakaz.

Parmi sa bann lensidan, enn ti raporte arive Grand Anse Mahé tandis ki in annan plizyer ki’n raporte arive Roche Caiman ek rezyon Mont Fleuri pandan mwan Zilyet.

Swivan larestasyon sa zonm 30-an Lari Hangard le 20 Zilyet, i ti ganny anmenm ankour e ganny rimann prizon.

Okour lanket anmennen par lapolis, levidans solid kolekte in etablir ki ti egalman annan en garson 14-an konman akonplis sa sispe 30-an dan vol Grand Anse. Sa garson sispe in ganny arete e toulede sispe in ganny sarze devan Lakour Mazistra Merkredi le 3 Out.

Premye akize, sa zonm 30-an, pe kontinyen rimann prizon ziska son bann ka i fini ekoute par lakour tandis ki sa akize 14-an ki trouv son kouzen, in ganny large apre ki son manman in siny en kosyon larzan lo son par a kondisyon ki i pa ganny sarze ankor pour en lot lofans parey pandan letan ki i deor.

Antretan lapolis pe osi fer lanket dan en lot ka kas lakaz e vole Pointe Larue.

Sa i an rezilta en lakaz ganny kase e vole plizyer fwa pandan lannwit dan distrik Pointe Larue tou dernyenman. En zonm 30-an sorti Mont Buxton in ganny arete Mardi sa semenn e ganny anmenn ankour Merkredi kot in formelman ganny sarze pour lofans komet.

Sa aprezan akize pe rimann prizon Montagne Posée ziska le 17 Out, zour ki i pou repas ankour.

Kominike sorti kot departman lapolis