STC i ouver en mini market lo Praslin |23 July 2022
Madanm Tirant ek Madanm Lafortune pandan sa interview avek lapres sa semen (Portre par Louis Toussaint)
Lakonpannyen Seychelles Trading Company (STC) in ouver en mini market lo Praslin pour ede fer desann pri lavi pour bann zabitan sa zil.
Se Marie-May Tirant, sef pour loperasyon ‘retail’ ki’n dir sa sa semenn pandan en ‘interview’ kot son biro, Bois de Rose Avenue. Osi prezan ti Madanm Stephanie Lafortune, zofisye relasyon piblik.
Madanm Tirant ti dir ki desizyon pour ouver sa mini market lo Praslin i annan de diferan laspe. Enn se ki apre ki STC ti deside ferm son retail supermarket akoz i ti pe fer bokou pert, in annan en leokri parmi bann zabitan ki zot pe ganny afekte avek bann pri egzorbitan dan bann lezot laboutik.
«Pour rezourd sa problenm e anliny avek komitman gouvernman pour esey redwir pri lavi, nou STC nou fonksyonn anba direktiv gouvernman ki donn nou en prerogativ pour gard bann pri komodite lo en nivo afordab pour popilasyon,» Madanm Tirant ti dir zournal Seychelles NATION.
Madanm Tirant in fer resorti ki STC i bezwen anmenn en meyer pri pour komodite lo Praslin. I azoute ki pri retail dan sa nouvo mini market STC lo Praslin pou menm pri avek sa ki Mahé.
Madanm Tirant i dir ki STC i annan bann distribiter lo zil ki aste bann prodwi STC e vann dan bann distrik lo pri ki ganny rekonmande par STC (RRP). I’n osi mansyonnen ki kou loperasyon bann ‘supermarket’ STC avan ti vreman o, e sa ti en pert pour STC akoz sa lokasyon ki zot ti pe pey bann lokater lo Praslin e lo La Digue.
Lo son kote, Madanm Lafortune i dir «nou bezwen fer sir ki nou pe ranpli nou komitman anver pep annantye lo Mahé, Praslin e partou. Pour le moman vi ki Praslin ti annan plis konplent e vi ki i annan dezyenm popilasyon pli gran, nou’n target Praslin pour donn zot sa fasilite. I pa en gran supermarket, i en mini market me i annan preski tou bann keksoz esansyel ki ou bezwen kot ou lakour. Me par kont si i annan keksoz ki bann Pralinwa pe rode zot kapab kontakte Msye Rahim Louange ki responsab sa retail outlet.»
Madanm Lafortune in mansyonnen ki sa fasilite pa zis pour Praslin me i pour bann zil pros e i kapab deservi bann dimoun ki reste La Digue, zis parey son STC wholesale ki lanmenm akote lo zil Eve.
Sa STC mini market i lo zil Eve e i pou ouver depi 8er bomaten ziska 5er apremidi, Lendi a Vandredi e 8er bomaten ziska 3er apremidi dan Sanmdi.
Madanm Tirant i azoute ki apre ki zot in analiz zot model biznes, zot in vwar ki si zot pou operate lo home ground, e pa pey lokasyon parey zot ti pe peye oparavan, zot abzorb zis kou transportasyon ant Mahé ek Praslin, sa i a fer ki sa loperasyon retail i a vin pli soutenab pour STC lo Praslin.
Antou, sa proze pour ouver sa mini market lo Praslin in kout lakonpannyen STC en sonm 579,000 roupi.
Linne Dubignon/Marla Simeon