Dan Lasanble Nasyonal |06 July 2022
I annan retar dan larive bato ki transport siman ki fer i annan mankman lo marse
Depi enpe letan in annan mankman siman lo marse e sa i akoz retar dan larive bato ki transport sa komodite e sa i akoz priyorite pour transport marsandiz alimanter in pran presedans lo transportasyon siman.
Me nou kapab konfirmen ki en kargezon siman pou ariv dan pei Zedi e si tou i mars byen siman ava konmans vann semen prosen, bann manm Lasanble Nasyonal in aprann dan sesyon yer bomaten.
Sete Minis responsab pour Lenvestisman, Lantreprenarya ek Lendistri, Devika Vidot, ki ti donn sa bann lenformasyon bann manm letan i ti pe reponn kestyon dirizan lopozisyon Sebastien Pillay lo sa size.
Kestyon Onorab Pillay ti lir koumsa :
‘Swivan gran konsern eksprimen an relasyon avek en problenm mankman siman lo marse lokal, eski Lasanble i kapab ganny en leksplikasyon lo si gouvernman in fer okenn lanaliz pour determinen ki pe arive egzakteman, e eski i annan okenn mezir ki gouvernman i anvizaze pran pour ede rezourd sa problenm?’
Minis Vidot in fer rapel bann manm Lasanble Nasyonal ki gouvernman pa dan biznes enport ouswa vann siman alor sa aktivite pa tonb direkteman anba okenn minister kontrerman avek karbiran ki tonb anba Seypec ki en lantite gouvernman anba zirisdiksyon minister responsab pour finans. Sa akitivite i antyerman dan lanmen sekter prive me malgre sa, marse siman i enn ki enteres gouvernman bokou akoz pri siman i enpakte direkteman lo pri konstriksyon ki an retour i afekte bann endividi ek devlopman dan pei.
Minis i dir sa size i osi annan bokou lenportans pour son minister e in dir ki pour reponn sa kestyon in fer plizyer diskisyon avek bann enportater siman ki’n fer resorti bann fe ek realite ki zot pe fer fas avek.
«Sa ki nou’n kapab konstate atraver bann diskisyon se ki in annan serten retar an sa ki konsern bato ki anmenn siman Sesel e enn bann pli gro fourniser regilye in eksplike ki tou dernyenman sa bato ki ti pou anmenn siman in ganny retar akoz priorite sete ki i transport marsandiz alimanter e avek sitiasyon ekonomik aktyel lemonn, sa in pran presedans lo transportasyon siman,» Minis Vidot in dir.
I dir sa bann enportater in osi konfirmen ki zot in fini met zot komann pour ankor de kargezon siman pour ziska lafen lannen.
«Anplis ki sa nou konpran ki byento lo marse pou annan en lot fourniser ki pou konsantre lo lenportasyon siman ki ava ede avek kantite stok ki pou annan anvant e li son kargezon i ekspekte antre dan pei semenn prosen,» Minis Vidot in enform bann manm Lasanble.
I’n osi dir ki sa enn fourniser in eksprim konsern konsernan retar ki bato in gannyen akoz move tan. I osi annan lezot fourniser ki dapre minis zot pe ekspekte zot bann kargezon ver lafen dimwan. «Tousala i ekspekte ede pour restabiliz stok siman lo marse,» Minis Vidot i dir.
Ansa ki konsern mezir ki gouvernman i anvizaze pran pour ede rezourd sa problenm, Minis Vidot in fer resorti ki gouvernman pe toultan rod fason pour stabiliz kou konstriksyon lo sa de zil.
Marie-Anne Lepathy