Mesaz minis alokazyon Lazournen Enternasyonal pour Lafanmir – 15 Me |16 May 2022
Minis Zialor
‘Les nou fanmir vin e reste sa pli gran motivasyon pour tou sa ki nou fer’
“Le 15 Me sak lannen i ganny dedye konman lazournen pour bann fanmir. Sa i donn nou loportinite pour selebre bann koneksyon ek relasyon ki fer nou en fanmir. I osi donn nou tou konman sosyete, sa sans pour reflesir lo valer ek rol primordyal ki bann fanmir i zwe pour byennet en nasyon.
“ ‘Mon Fanmir, Mon Leker!’ Sa i tenm ki Minister pour Lazenes, Sport ek Lafanmir in adopte pour konmemor sa lazournen. Sa tenm pe met an valer bann fanmir Seselwa e anmenmtan pe demann nou pour protez nou fanmir e pran konsiderasyon bezwen inik e diferan tou nou bann fanmir.
“Nou fanmir i devret touzour reste en parti nou menm, e ansanm nou devret fer tou pour asir byennet ek lepanouisman nou bann fanmir. Nou fanmir ek nou lakour i devret reste en landrwa sen, an sekirite, kot lanmour i sirmont tou defi lavi. En fanmir kot sak manm i kapab zouir en lavi an bonn sante, kot sak manm i kapab devlop li dan en fason akademik ek profesyonnel, kot i kapab angaz li aktivman e pozitivman dan lavi sosyo-ekonomik son pei.
San sa leker, sa fanmir pa pou reisi, les bann fanmir Seselwa vin sa pou (pulse) pour reisit e byennet nou fanmir, les nou fanmir vin e reste sa pli gran motivasyon, sa pli gran rezondet pour tou sa ki nou fer – dan travay, dan lakominote e dan nou sosyete.
“Nou minister in swazir pour sa lannen dedye en mwan – depi le 15 Me ziska le 15 Zen – a bann fanmir Seselwa. Annou pa zis selebre bann fanmir, me annou osi kre sansiblizasyon, annou diskite e osi ansanm annou trouv solisyon pour bann ki dan bezwen.
“Nou minister i reste angaze e determinen pour ed bann zonm, fanm e osi zanfan pour konpran kanmarad pli byen, develop bann pli bon relasyon ek, e antre kanmarad, e an rezilta amelyor kalite zot lavi.
“Pour terminen, annou rapel ki lafanmir i sa premye lenstitisyon sosyal, se la kot nou develop e resevwar premye ledikasyon lavi, kot nou aprann e develop bann bon valer e savwar fer ki reste ek nou pour lavi diran, akoz apre tou en fanmir an armoni i garanti prosperite ki dekoul dan lakominote, dan sosyete e dan pei an zeneral.”
Marie-Celine Zialor
Minis pour Lazenes, Sport ek Lafanmir