Mesaz pour lazournen travayer sorti kot Msye Ralph Volcere, prezidan Linyon Travayer Sesel (SLU) |30 April 2022
«SLU i reste dedye a son komitman pour pouse pour ki drwa tou travayer isi Sesel i ganny respekte»
«A lokazyon lazournen enternasyonal bann travayer, Linyon Travayer Sesel (SLU) i swet tou son bann manm e tou travayer isi Sesel en tre bonn fet. SLU i swete ki omwen pour sa lazournen bann travayer ava kapab pas en bon moman detant dan lanmitye avek kanmarad e osi avek zot anplwayer.
«SLU i reste dedye a son komitman pour pouse pour ki drwa tou travayer isi Sesel i ganny respekte dan tou sitiasyon e devan tou lenstans. SLU i reste ferm lo son konviksyon ki en trezyenm mwan saler i en drwa ki tou travayer i annan akoz an efe zot travay pandan 13 mwan dan en lannen, baze lo en kalkilasyon kat semenn par mwan.
«SLU i reste ferm akote demann bann travayer ki laz retret pa sanze e ki sa i reste 63-an parey i ete konmela.
«Ozordi travyer i fer fas avek en kantite defi e sitiasyon ki kapab dekouraz zot. SLU i demann bann travayer ki pe rankontre bann problenm ki zot krwar i ensirmontab pour pa perdi lespwar akoz zot pa tousel. SLU i la pour zot. Pas kot nou lofis ouswa ganny kontakt avek nou.
«Ozordi plis ki zanmen i neseser ki tou travayer i met zot lekor a zour avek bann lalwa ki gouvern travay isi Sesel, pour ki zot kapab konnen kwa ki zot drwa osi byen ki zot bann responsabilite dan landrwa travay.
«En bon lantant dan travay i neseser pour ki nivo prodiktivite i kapab kontinyelman ogmante e pour sa arive fodre ki travayer konman anplwayer i fer konfyans kanmarad. Travayer i devret a tou moman donn son maksimonm dan son louvraz e anplwayer i devret rekonnet e osi rekonpans travay dir dan en fason ki zis e egal. Fodre gard an tet sa dikton Kreol ki dir ‘tou penn i merit son saler’.
«SLU i fer en lapel avek gouvernman pour pran mezir serye, ferm e atan avek bann vyolasyon lalwa travay e pour elimin bann posibilite koripsyon dan tou son bann lenstitisyon ki administre lalwa travay isi. En latansyon spesyal fodre ganny mete lo size donn GOP e osi la fason ki sa bann dimoun ki’n vin isi pour travay i ganny trete.
«SLU i remersye tou travayer ki’n fer li konfanys dan sa 1-an legzistans. Se gras a sa konfyans ki zot in fer nou ki SLU in kapab resisit linyon travayer isi Sesel pour byennet tou travayer konman anplwayer pour ki nou vreman kapab ansanm pous devlopman nou pei pli devan…»
