Dan Lasanble Nasyonal Deplasman aletranze par Prezidan, minis ek bann o zofisye in kout pei 4.42 milyon roupi ziska prezan |06 April 2022
Depi ler Prezidan Wavel Ramkalawan in pran lofis an Oktob 2020 ziska la Avril 2022, tou bann deplasman ki li, son bann minis ek lezot o zofisye gouvernman in fer aletranze in kout pei en sonm total 4.42 milyon roupi.
Minis pour Zafer Etranzer ek Tourizm, Msye Sylvestre Radegonde, ti donn sa lenformasyon letan i ti pe reponn en kestyon notis prive (Private Notice Question) par dirizan lopozisyon, Onorab Sebastien Pillay, dan Lasanble Nasyonal yer bomaten.
Onorab Pillay ti anvi ganny detay lo konbyen in koute pour tou sa bann deplasman ki Prezidan Larepiblik ek son bann minis in fer depi Oktob 2020 enkli sa enn ki zot fek ale resaman kot ti annan senk minis enkli Prezidan li menm.
Me avan ki i ti donn son larepons lo sa size, Minis Radegonde ti profite pour met sa zafer vwayaz dan konteks pour ki, i ti dir, tou dimoun ava pli byen konpran, kote nou sorti, ki nou pe fer e kote nou oule ale.
«Nou relasyon avek bann diferan pei, bann lorganizasyon enternasyonal pa nouvo e pa fek konmanse avek sa nouvo ladministrasyon. Dan relasyon enternasyonal i annan serten degre kontinite e dan nou bann zafer etranzer napa bokou keksoz ki nou’n sanze e nou bezwen kontinyen reste angaze avek kominote enternasyonal,» Minis Radegonde in dir.
I’n osi fer remarke ki pandan 2-an lockdown akoz Covid-19, mazorite kontakt avek lemonn eksteryer in atraver zoom, telefonn, faks ek lezot mwayen kominikasyon virtyel me la ki lemonn in konmans reouver, i kler ki nou osi nou bezwen resorti e nou pa kapab reste deryer ler bann dirizan lemonn pe diskit bann size ki riske konsern nou, pran bann desizyon ki riske tous nou e nou, nou pa la pour nou dir nou mo ladan.
«Nou ganny en kantite lenvitasyon sorti kot diferan pei ek lorganizasyon enternasyonal me nou pa kapab aksepte tou sa bann lenvitasyon, nou bezwen selektiv e fer serten priyorite e minister i regard depre sak lenvitasyon ki nou gannyen e vwar ki i annan ladan pour Sesel, si i tonb dan nou priorite nasyonal, si i pou ed nou avanse lo serten dosye parey nou anvi, ki son benefis dan kourt, mwayen e long term i pou anmennen pour pei, eski i pou elev nivo Sesel, fer lemonn konn son defi ek lezot keksoz lo Sesel. I annan defwa nou ganny envite pour partisip dan sa bann miting pour montre nou komitman dan en lorganizasyon, montre respe pour sa lorganizasyon dan ki nou form parti, pour montre nou lanmitye ek solidarite avek en pei. Ler ou manm en klib ou pa kapab toultan absan me ou bezwen detanzantan montre ou figir,» Minis Radegonde in eksplike.
I dir ki zot osi gete kwa ki sa bann pei ek lorganizasyon ki pe envit nou pe peye, si zot pe pey tou fre oubyen zis enpe e kwa spesifikman e tousala i ganny etidye avan en desizyon i ganny pran e osi si nou pou partisipe ki nivo delegasyon ‒ si prezidansyel, ministeryel ou ot e ki kantite dimoun pou annan dan sa delegasyon.
Minis Radegonde ti asir Lasanble ki ler Prezidan oubyen minis i deplase i pour en bezwen absoli e ki napa okenn lot mwayen pour pa ofans sa pei ou lorganizasyon ki’n envit nou.
Minis Radegonde in osi fer remarke ki a plizyer repriz in servi sa nef anbasader aletranze osi byen ki bann konsil onorer pour reprezant li dan bann miting me sa i pa toultan posib. I’n osi enform Lasanble ki dan bann semenn ki vini i annan 2 renyon ki in bezwen turn down akoz menm si zot zwenn bann kriter pour nou asiste i annan bann kou ki atase avek e «dan lentere sov sou Seselwa mon’n prefere pa ale».
Minis Radegonde ti answit donn detay depans bann vwayaz ki Prezidan Wavel Ramkalawan in fer depi in pran lofis an Oktob 2020.
Premye deplasman i ti al Moris e deplasman ti finanse parsyelman par Moris, avyon nou pa ti pey dan vot gouvernman me IDC ki pey bann fre. Sa 4 milyon roupi ki ti dan bidze pour depans vwayaz dan biro Prezidan pa ti ganny servi. Pour deplasman UAE, avyon ek lotel ti peye par UAE.
A sa pwen Minis Radegonde ti fer rapel bann manm Lasanble ki dan lepase osi letan bann Prezidan ti vizit Abu Dhabi ou Dubai zot pasaz ek lotel ti toultan ganny peye par gouvernman UAE e napa nanryen ki’n sanze anba Prezidan Ramkalawan.
«Tou sa deplasman ki nou fer Dubai – UAE, bann deplasman ki bann minis i fer dan sa pei, tou i ganny kouver par gouvernman UAE. Gouvernman Sesel i pey supplementary allowances ek reduced per diem ki prevwar anba PSO e sa antou ti kout gouvernman apepre 200,000 roupi,» Minis Radegonde in eksplike.
A sa pwen i ti donn detay Lasanble lo tou bann lezot deplasman ki Prezidan, bann minis enkli li menm ek lezot o zofisye gouvernman zot in fer depi Oktob 2020 ziska ozordi e detay lekel ki’n peye e konbyen tousala in koute.
Minis Radegonde in dir ki antou depi ler ladministrasyon Prezidan Ramkalawan i dan lofis Oktob 2020 ziska la, depans pour deplasman prezidansyel e sa ki pour bann minis in ariv en pti pe par lao 4 milyon roupi.
Dan en kestyon siplemanter Onorab Pillay ti ensiste ki i ganny en pli bon breakdown tou sa bann depans enkli per diem e tou bann tiket avyon. Pour sa Minis Radegonde ti presize ki sa bann depans ti’n ariv en sonm presiz 4 milyon 42 mil roupi.
Marie-Anne Lepathy