Dan Lasanble Nasyonal |31 March 2022

Move planifikasyon ek sipervizyon i rezon pour retar dan konstriksyon nouvo lekol La Rosière

Minis pour Ledikasyon, Dr Justin Valentin, in dir move planifikasyon ek sipervizyon lo kote lokal osi byen ki lo kote konsiltan enternasyonal ki ti’n ganny demande pour siperviz travay konstriksyon lo nouvo lekol La Rosière i bann sirkonstans ki’n anmenn retar dan sa proze.

I dir i malere ki depi 2014 lekol La Rosière pa’n ganny konstrir parey gouvernman sa lepok ti’n promet e sa kestyon in ganny anmennen dan Lasanble a plizyer repriz.

Minis Valentin ti fer sa bann remark letan i ti pe reponn en kestyon par MNA pour Mont Buxton Gervais Henrie lo sa size.

Minis Valentin pa ti koz lo bann sirkonstans avan ki i ti pran lofis me plito ant Zilyet ek Novanm 2021 apre ki demars ti pe rekonmanse pour lans tender pour sa proze.

I dir a sa pwen nouvo lekip ti remarke ki fason ki sa lekol ti pou vire ti pou en distraksyon e non pa dan lavantaz laprantisaz e teren kot sa lekol ti pou plase ti pli pti ki son plan e sa in nesesit fer en nouvo desen pour laprouvasyon.

Sa proze in aprezan transfer avek nouvo Lazans Pour Lenfrastriktir ki pou pran sarz sa devlopman.

E nouvo tim ki pe travay lo sa proze pou bezwen revwar li dan son totalite e lefe ki dele letan pour servi sa larzan lòn ki gouvernman ti’n gannyen avek Labank Koweit pour rekonstriksyon sa lekol in ganny anvoye pour plizyer fwa e in aprezan ekspire, nouvo gouvernman pou bezwen al renegosye sa lòn.

Me i dir gouvernman i reste angaze pour rekonstrir lekol La Rosière.

Dan en kestyon siplemanter Onorab Henrie ti anvi konn plis lo renegosyasyon sa lòn e ki kalite swivi minister ledikasyon pe fer pour bann zanfan ki ti lekol La Rosière ki aprezan eparpiye dan diferan lekol.

An sa ki konsern renegosyasyon sa lòn Minis Valentin i dir ki in deza annan en konversasyon avek minis finans lo sa size e in asir Lasanble ki sa pou ganny fer e sa lekol pou ganny rekonstrir. Lo kote bann zelev sa lekol, Minis Valentin i dir son minister i santi ki i en lenkonvenyans pour sa bann zanfan e bann paran me i dir zot pe fer zot mye e pe pouse pour fer ki sa proze i realize dan en pli kourt dele letan posib.

……………………….

Minister Ledikasyon pe al entrodwir en kors Diploma in Special Education Needs

Apartir lannen prosenn Minister Ledikasyon atraver Sant Formastyon Pour Ansennyan (SITE)

pou entrodwir en nouvo kour Diploma in Special Education Needs kot bann kandida pou etidye pli oprofon bann bezwen partikilye bann zanfan, sekreter prensipal pour ledikasyon Merna Eulentin in dir dan Lasanble Nasyonal Mardi.

I ti dir sa letan i ti pe reponn en kestyon par MNA pour Au Cap, Kelly Saminadin.

Kestyon Onorab Saminadin ti konm swivan: “Anvi ki i annan en mank formasyon dan lansennyman special needs education parmi popilasyon ansennyan dan Sesel e pour asire ki diverzans bann aprenan osi byen ki enklisivite i ganny pli byen enplimante, eski Minis responsab pour Ledikasyon i kapab eksplik Lasanble :

- Ki plan minister an sa ki konsern formasyon, pour asire ki sak etidyan, pe enport son kapasite entelektyel, i ganny ankadre ?

- Ki pou rol minister, ensi ki bann diferan parti prenan, dan sa demars an term sipor ek resours pour asire ki nou bann lekol i reisi kapab ede relev nivo nou bann etidyan ?

PS Eulentin i dir ki deza en module on special needs and deferentiation i form parti dan progranm formasyon bann ansennyan kot SITE. Sa i annan pour bi ekip bann ansennyan avek formasyon debaz pour kapab ankadre tou zanfan pe enport zot kapasite entelektyel.

I dir ki Minister Ledikasyon atraver son Special Needs Unit i deza pe donn bann formasyon a kour term bann ansennyan ki apel SENCO (Special Education Needs Coordinator) o nivo primer e segonder pour asire zot annan serten bagaz tel parey devlopman konpetans pour kapab ed bann zanfan avek difikilte pour aprann.

“Premye faz sa formasyon pour primer ek segonder in terminen le 24 Mars 2022 e dezyenm faz pou konmanse okour dezyenm trimes lekol sa lannen. Par kont nou rekonnet ki sa bann formasyon pa sifizan e i merit annan enpe plis. I pour sa rezon ki apartir lannen prosenn minister atraver SITE pou entrodwir en nouvo kour Diploma in Special Education Needs.

I dir bann aplikan ki pou kalifye pou kapab bann etidyan ki’n konplet S5, bann kandida endepandan osi byen ki bann ansennyan ki ti ava kontan swiv en tel formasyon sirtou bann ki napa en diplonm.

Dan ka kot en ansennyan i deza annan en diplonm e swete spesyaliz dan special needs education o nivo degre, atraver son plan formasyon, Minister Ledikasyon pou get dan posibilite anvoy zot aletranze vi ki lokalman napa sa kour lo nivo degre.

“O nivo minister nou anvi onor sa polisi enkliziv ki date depi 2015 dan tou son totalite alor bann evaliasyon neseser pe entansifye pandan sa lannen,” PS Eulentin in fer resorti.

An sa ki konsern resours, PS Eulentin in dir minister pe revwar kalite resours ki pe distribye dan bann lekol e en legzersis in konmanse pour vwar resours ki bann lekol i annan sirtou liv ek lezot materyo ki minister limenm i distribye par lekol pandan trimes e pandan lannen. Sa legzersis pe fer atraver bann distribution and consumption analysis e sa an etrwat kolaborasyon avek tou bann parti konsernen enkli responsab bann diferan lekol kot apre bann rekonmandasyon ki pou relevan avek laprantisaz ki ava ganny fer.

“I pou nepli en legzersis kot zis headquarters ki pou desid lo tou kalite resours e apre distribye me i pou plito en prosesis kolaborativ ki pou enkli bann desizyon kontinyel anliny avek progranm skoler ki anba revizyon,” PS in dir.

I’n fer remarke ki avek son nouvo plan stratezik, minister pe promouvwar en ledikasyon modern kot i pe viz lo annan plis resours online ki ansennyan i kapab download.

I’n osi dir ki salannenminister pe anvizaze ki tou nivo primer e segonder i annan en projector ek en laptop ki ava permet ansennyan minimiz kantite kontak avek lakre ek tablo. Tou sa i avek bi moderniz nou sistenm ledikasyon ki en priyorite stratezik minister ledikasyon.

“Nou rekonnet konman en minister ki i annan en mankman bann resours spesyalize pour bann etidyan avek bann bezwen spesyal (special needs) e alor minister in fer li son devwar ki apartir Mars sa lannen letan i fer rekizisyon pour bann resours, lalis resours pour sa bann tel etidyan pou osi enkli e sa ti pe ganny fer zis pour Lekol Eksepsyonnel e la i pe ganny fer pour tou lekol e sa i a fer ki apartir sa lannen nou ekspekte ganny tou bann lekipman ki bann zanfan special needs zot bezwen,” PS Eulentin in asir bann manm Lasanble.

Marie-Anne Lepathy