Dan Lasanble Nasyonal |31 March 2022
Ankor dezakor, spiker i donn permisyon en manm pour sansir en lot, lopozisyon i kit Lasanble
O konmansman sesyon Lasanble yer bomaten ti annan ankor dezakor ek largiman ant Spiker Roger Mancienne e dirizan lopozisyon Sebastien Pillay apre ki sa onorab ti’n lev plizyer pwen lo ki i ti pe demann leksplikasyon ziska ti ariv en pwen kot spiker ti donn permisyon en lot manm pour anmenn en mosyon pour sansir li.
Ti dan en matter of privilege ki i ti leve anba Order 40 Standing Orders Lasanble, ki dirizan zafer gouvernman Onorab Bernard Georges ti demann Spiker Roger Mancienne pour rule ki privilez Lasanble an antye in ganny afekte e pe kontinyelman ganny afekte par lefe ki i dir dirizan lopozisyon Onorab Sebastien Pillay i swazir toultan tou leskiz pour li adres Lasanble e dir tre klerman ki i pe fer sa pour bann dimoun deor tande e i pa pe swiv okenn Standing Orders Lasanble e ki i pe abiz son pouvwar akoz a sak fwa i pran mikro i profite pour fer en kantite lezot pwen. I ti demande ki si spiker i rule dan son faver semenn prosenn i pou anmenn en mosyon sansir kont Onorab Pillay. E Spiker ti aksepte demann Onorab Georges. A sa pwen Onorab Pillay ti dekri latitid Onorab Georges konman dominer e ki i pe al tro lwen e ki i pa ti’n fer nanryen mal pour ki sa mosyon i ganny anmennen kont li.
Bann lesanz ti kontinyen ant Spiker Mancienne e Onorab Pillay ki ti akiz Spiker Mancienne konmkwa i pe abiz son pouvwar konman spiker e ki i mank fairness dan son travay.
Spiker ti dir Onorab Pillay ki i ava annan sans adres sa pwen ler mosyon ava vin dan Lasanble semenn prosenn. A sa pwen Onorab Pillay ti kit Lasanble e tou manm son parti ti swiv li.
Tou ti konmans avek de pwen ki dirizan lopozisyon ti leve konmansman sesyon e sa ti konsern demann pour SBC vin reponn kestyon Lasanble. I ti dir ki SBC i dakor pour vin dan Lasanble reprezante par son bord ek son sef egzekitif. I ti dir SBC in osi fer resorti ki pour minis lenformasyon vin dan Lasanble pour vin reponn kestyon lo son zesyon ek son gouvernans pa annakor avek fason travay e lendepandans SBC.
Msye Pillay ti dir lefe ki Vis-Prezidan ti vin litousel pour reponn kestyon lo SBC sa i kontradir prezans Vis-Prezidan dan Lasanble.
Spiker Mancienne ti fer rapel Onorab Pillay ki dapre Standing Orders Lasanble i ti’n devret averti Spiker davans ki i anvi fer sorti serten pwen lo kondwit Lasanble e osi fason i fer son travay. Me olye reponn sa pwen Onorab Pillay konsernan SBC, Spiker Mancienne ti demann depite spiker Onorab Gervais Henrie pour adres sa size. A son tour Onorab Henrie ti fer resorti ki sa ki SBC ti’n dir lo sa size ti out of order me vi ki sa size i tre enportan e i konsern travay Lasanble i ti demande ki i ganny anmennen dan diskisyon komite ABC Lasanble pour dil avek vi ki i ti pou annan en rankont son apremidi menm olye ki pran letan sesyon Lasanble pour rod en solisyon.
Lo son kote, Onorab Georges ti osi zwenn Onorab Henrie pour dir ki kominike SBC lo sa size ti konpletman ‘out of order’ e lefet ki dirizan lopozisyon ti’n relev sa size bomaten ti osi ‘out of order’.
“Sa i akoz sa kestyon i senp e son repons i dan Order 31. Lider lopozisyon ti demann en kestyon Vis-Prezidan e non pa SBC e si i ti anvi SBC i vin devan Lasanble i annan plizyer fason ki i ti’n kapab fer sa – Iti’n kapab demann SBC pour vin fer en deklarasyon, i ti’n kapab anmenn en mosyon…me in swazir pour li demann en kestyon e kestyon i senp anba Order 31,” Onorab Georges ti dir e a sa pwen i ti donn detay ki Order 31 i dir lo sa size e li osi i ti demande pour ki sa size i ganny diskite a fon dan ABC.
Lo son kote Spiker Mancienne ti dir ki dan Standing Order Lasanble en minis i kapab anmenn zofisye ki i anvi avek li pour reponn kestyon me ki li konman spiker i pa’n zanmen dir minis lekel zofisye i pou anmennen me ki si i anvi sa i sanze zot kapab diskite dan ABC.
Lot pwen ki Onorab Pillay ti leve ti konsern en ruling ki Spiker Mancienne ti fer dan sesyon Mardi me sa ruling ti konsern en sesyon depi semenn pase kot Onorab Johan Loze ti ganny met deor. Me Mardi sa semenn Spiker Mancienne ti retourn lola e demann Onorab Loze pour apologise pour son konportman en keksoz ki sa onorab ti refize fer e la ankor i ti ganny sispann pour sa sesyon en sitiasyon ki Onorab Pillay i dir ti’n devret ganny dil avek depi semenn pase e sa ki Spiker Mancienne in fer i kont Konstitisyon ek StandingOrders Lasanble.
Onorab Pillay ti dir ki son parti pe konsider anmenn en ka an kour kont li pour prosedir ki in servi pour sispann Onorab Loze. Spiker Mancienne ti a sa pwen donn son prop leksplikasyon lo ki ti’n arive e akoz i ti’n pran sa desizyon.
Me apre sa ti annan ankor diskisyon ek lesanz ant Onorab Pillay e Spiker Mancienne lo diferan provizyon Standing Orders Lasanble ki ti fini par Onorab Georges ki ti demann Spiker pour permet li anmenn en mosyon sansir kont Onorab Pillay.
Marie-Anne Lepathy