Dan Lasanble Nasyonal |30 March 2022
Gouvernman pa kontrol SBC e i napa lentansyon fer li ‒ VP Afif
Vis-Prezidan Ahmed Afif in dir dan Lasanble Nayonal yer bomaten ki gouvernman pa kontrol SBC e i napa lentansyon fer li akoz i pou en aksyon ilegal vi ki anba Konstitisyon SBC i annan son prop lalwa ki fer li fonksyonn dan en fason endepandan avek Leta, avek politik ouswa lezot lenfliyans lezot lorganizasyon, dimoun ou parti politik.
Vis-Prezidan Afif, ki osi responsab lenformasyon, ti donn sa bann leksplikasyon letan i ti pe reponn en kestyon notis prive par dirizan lopozisyon Sebastien Pillay lo lenparsyalite SBC. Kestyon Msye Pillay ti konm swivan : «Eski Lasanble i kapab ganny en leksplikasyon lo akoz ki SBC pa pe zwe son rol dan enparsyalite anliny avek bann prensip laliberte lekspresyon dan nou Konstitisyon e bann grann liny dan Lalwa SBC?»
VP Afif in fer rapel Lasanble ki an 2017 ti annan en lamannman mazer dan sa lalwa ki ti sanz lafason ki tyermenn ek depite tyermenn bord, bord limenm, sef egzekitif, son depite osi byen ki 6 lezot manm ti ganny apwente e sa ti annan pour bi redwir lenterferans politik dan SBC e pour donn li son lendepandans annakor avek Konstitisyon.
«Alor i kler ki Leta pa kapab enterfer dan rol SBC e SBC menm si i pa parfe, me avek resours ki i annan i pe pas bokou progranm kot bokou pwennvi i ganny partaze. Sa bann progranm i enkli ‘Bonzour Sesel’, ‘Topik Konversasyon’, ‘Tet a Tet’, ‘Lopinyon’, ‘Dyalog an Direk’ osi byen ki bann progranm politik e menm konferans lapres lopozisyon ki pas an direk malgre ki sa i kapab poz serten kontrent legal pour SBC akoz i napa kontrol editoryal vi ki i an direk. Tousala i montre sa transformasyon ozordi ki en depar avek lepase kot Leta ti kontrol SBC. Zot ava rapel sa lepok ti napa personn kot SBC ki ti oze pas okenn progranm ki ti kapab ganny vwar pe kritik gouvernman,» VP Afif in fer resorti.
I’n fer remarke ki li i pa la pour defann SBC ni son bann polisi akoz sa i pa ni rol e ni lentansyon gouvernman. I dir i la pour fer resorti ki SBC i endepandan dan son bann progranm, son konteni editoryal e son bann polisi entern.
«Si lider lopozisyon i krwar ki sa i pa leka, parey nenport ki dimoun, i annan son drwa pour eksprim li direkteman avek SBC. Ozordi nou dan en pei lib e gouvernman pa pou enterfer oubyen reponn kestyon lo lapar SBC e lo son fason fer. Nou pa’n zanmen enterfer avek SBC e mwan mon kapab asir ou e tou dimoun ki nou pa pou zanmen fer li oubyen azir dan okenn fason ki pa anliny avek lalwa e Konstitisyon,» VP Afif in eksplike.
I’n profite pour fer rapel SBC ki pep Seselwa i annan gran lekspektasyon de zot e bann editer i devret fer sir ki dan tou progranm ki zot pase ki se laverite ki pas an premye anliny avek zot rol pour donn lenformasyon balanse.
Sa i sel fason ki nou pep i ava kapab tir bann konklizyon ki lozik e entelizan.
I’n osi fer rapel Onorab Pillay ki se parti ki’n form gouvernman dizour ki ti lager san ses pour enparsyalite, laliberte lekspresyon akoz i egzakteman sa ki ti’n disparet depi koudeta 1977.
«Nou kontan ki ozordi tou Seselwa i annan drwa kestyonn SBC ou nenport ki medya e sa i akoz zot drwa fondamantal in ganny respekte e Leta pa pou enterfer avek zot drwa oubyen drwa SBC.»
Me swivan en kestyon konsernan en deklarasyon ki Prezidan Wavel Ramkalawan ti fer dan son konferans lapres semenn pase konmkwa i ganny lenformasyon lo tou sa ki pase dan newsroom (lasal nouvel) SBC e ki sa i montre lenterferans ek enparsyalite SBC, VP Afif i dir Prezidan i ganny lenformasyon avek bokou sitwayen sorti partou e sa i akoz zot annan en drwa pour kontakte e enterakte avek zot bann dirizan e MNA kot zot pas lenformasyon.
«Prezidan in senpleman dir ki li i ganny lenformasyon ki pase dan newsroom me eski sa i vedir ki li i pe donn en lord newsroom ki i pou fer? Pa ditou me si lopozisyon i annan en problenm lo fason ki SBC pe dil avek en parti politik, sa parti i devret soumet son konsern an ekrir avek sef egzekitif SBC e si i pa satisfe avek larepons i kapab anmenn son konsern kot bord SBC e apre sa si i ankor touzour pa satisfe i kapab rod rekour devan Lakour akoz se koumsa ki keksoz i marse dan en demokrasi,» VP Afif in dir.
Me swivan en lot kestyon lo akoz VP Afif pa’n vin avek swa sef egzekitif, swa tyermenn bord SBC pour reponn sa kestyon parey zot ti fer avek STC, VP Afif ti dir ki SBC pa parey STC akoz STC i en lorganizasyon ki son propriyeter i gouvernman Sesel e napa nanryen ki dir ki STC i endepandan avek gouvernman. STC i raport direkteman avek Minister Finans e i en antite ki swiv polisi ki ganny etabli par gouvernman. Alor i toutafe normal ki STC ti vin reponn kestyon lo son loperasyon e lo stok manze dan pei.
Marie-Anne Lepathy