Dan Lasanble Nasyonal Bann manm lopozisyon i kit lasal |24 March 2022
Swivan dezakor ek lesanz parol ant Spiker Roger Mancienne ek dirizan lopozisyon Msye Sebastien Pillay o komansman sesyon Lasanble yer bomaten konsernan bann dokiman ki i ti’n demann Minis pour Transpor Antony Derjacques Mardi e swivan lenteripsyon par lezot manm parti lopozisyon pli partikilyerman Johan Loze, Spiker Mancienne ti demann li pour sorti e tou lezot manm sa parti ti swiv.
Lo sa size privilez leve par dirizan lopozisyon konsernan bann dokiman ki i ti’n demann Minis Derjacques, Spiker Mancienne i dir i ti’n fer son mye pour eklersi sa size par vwar ki Konstitisyon i dir.
“Referans lo dokiman pour Lasanble dan Konstitisyon i dan Lartik 104 ki koz lo formasyon bann standing committees dan Lasanble prensipalman lo Finance and Public Accounts Committee (FPAC) osi byen ki Standing Orders Committee,” Spiker Mancienne in fer resorti.
I ti profite pour lir avek bann manm sa ki Clause 3 sa Lartik i dir lo sa size.
“Sa i sa ki mon’n vwar dan Konstitisyon me si i annan lot lenstans dan Konstitisyon ki fer referans a sa size, mon pa’n vwar me mon pe envit dirizan lopozisyon pour si i annan diskisyon pour fer avek sa ki mon’n dir i kapab adres mwan an prive pour met lezot referans a mon latansyon si i santi ki sa i bezwen ganny revize. Alor mon ruling lo sa matter of privilege pour lider lopozisyon i ki mon pa krwar ki dan sa lenstans son privilez in ganny afekte me ki i devret apros sa size desizyon e sa size dokiman pour Lasanble atraver FPAC,” Spiker Mancienne in eksplike.
A sa pwen i ti fer referans a dokiman FA4JR ki manm dan Lasanble oparavan ti demande me ki pa ti zanmen ganny prodwir. I dir sa i sel referans lo presedans ki i annan antet e ki in oule site konman parti son ruling ki final e ki i pa pe antre dan okenn deba e ki si i annan okenn lezot kestyon lo sa bann ruling, lider lopozisyon ou lezot manm i devret adres sa bann pwen avek li Spiker an prive.
Me letan lider lopozisyon ti lev son lanmen pour en point of order Spiker Mancienne ti demann li pour met sa an ekri me Msye Pillay ti ensiste ki sa ki i ti pe al demande ti annan pour fer avek sa ki Msye Mancienne ti’n fek dir e alor i ti ganny sans pour koze.
I ti atir latansyon Spiker lo Order 8 (2) Standing Orders Lasanble e la i ti lir provizyon sa Order ki annan pour fer avek ki mannyer bann dokiman i ariv devan Lasanble e la i ti sit plizyer dokiman ki Lasanble in resevwar sorti kot diferan minister ek lazans e i ti demande alor “ki mannyer Minis Anthony Derjacques, ki minis pour transport, pe esey kasyet deryer Spiker Lasanble Nasyonal pour li pa donn nou en dokiman dan Lasanble Nasyonal”.
A sa pwen Spiker Mancenne ti demann Msye Pillay pour aret koze akoz sa ki i ti pe dir ti out of order e ki si i ti annan okenn lezot kestyon, pour met an ekrir.
A sa pwen lezot manm parti US ti pe koze dan lasal e Spiker Mancienne ti demann Onorab Johan Loze pour sorti dan lasal e an rezilta tou lezot manm parti lopozisyon ti kit lasal.
Marie-Anne Lepathy