Lakominote Bahá'í i met pare pour selebre Naw-Rúz |19 March 2022

Le 21 Mars i mark lafen 19 zour karenm kan Baha’i i antre dan Nouvel An, oubyen Naw-Rúz parey i ganny apele, e sa letan in ganny dekri konman sa moman dan lannen ler labote fizik ek spirityel i melanz ansanm e nou avans dan en lot lannen kot nou lam pou vin pli matir e prepar nou pour "rwayonm eternel”.

Sa mo Naw-Rúz i en non Arabik ki vedir ‘Nouvo Zour’ oubyen ‘Nouvo Lannen’ e i premye zour Lannen Baha’i.  I ti ganny enstitye konman en festival pour bann ki obzerv karenm. Dan son prop mo, Baha’u’llah I dir: “Nou’n komann zot pour obzerv karenm pandan en peryod bref, e a son lafen, nou’n deziny pour zot Naw-Rúz konman en lafet..."   

Naw-Rúz i osi lannen Persan. Istorikman, Naw-Rúz i ganny selebre atraver bann pei dan Mwayenn Oriyan, Sant Lazi parey Iran, Azerbaijan, Afghanistan, e Latirki, e pour byen lontan in en konze nasyonal an Iran e ti ganny selebre parmi plizyer group relizye. Alor, Naw-Rúz pa pran son lorizin dan Lafwa Baha’i, me i en selebrasyon Persan ansyen ki mark konmansman lannen Zoroastrian. I ganny selebre konman sa zour ki Zoroaster ti ganny son revelasyon sorti kot Bondye. Me menm sa, sa zour pa ti ni pran son lorizin avek Zoroaster, akoz tradisyon in annan li pour plis ki 15,000-an, menm avan ‘ice age’. Menm si i pa’n zanmen en festival Mizilman, selebrasyon Naw-Rúz ti kontinyen ganny obzerve LaPers menm apre ki sa pei ti vin anba gouvernans Mizilman.

Alor, ki sinifikasyon Naw-Rúz dan lafwa Baha’i?

Le Báb, ki Fondater larelizyon Babi, ti entrodwi en nouvo kalandriye ki kontyen 19 mwan, e dan sak mwan i annan 19 zour. Sak sa bann mwan i ganny nonmen apre en atribi Bondye ; pareyman, sak sa bann 19 zour dan bann mwan zot osi nonmen apre en atribi Bondye.  Premye zour e premye mwan ti ganny donnen atribi Baha, en mo Arabik ki vedir splander oubyen laglwar, e alor premye zour lannen ti zour Baha dan mwan Baha. Naw-Rúz ti ganny apele ‘Zour Bondye’ par Le Bab, e ti ganny asosye avek Sa Enn Ki Bondye ti pour fer Manifeste, e sa se Baha’u’llah.  Bann larestan 18 zour dan premye mwan ti ganny asosye avek sa 18 Let di Vivan, bann zapot LeBab, e sa ti pe anvizyonn en selebrasyon ki ti pou dir pour 19 zour. 

Bahá'u'lláh, Fondater Lafwa Bahá'í, ti adopte sa nouvo kalandriye, ensi ki Naw-Rúz konman en zour sakre. Sa zour i swiv mwan karenm, e i ti eksplike ki Naw-Rúz ti ganny asosye avek Le Pli Gran Non Bondye.   

Abdu'l-Bahá, garson e sikseser Bahá'u'lláh, in eksplik sinifikasyon Naw-Rúz an term Prentan e nouvo lavi ki i amennen. I dir, « ... Sa zour sakre, ler ki soley i ilimin later egalman, i apel lekinoks, e lekinoks i senbol bann Manifestasyon Bondye, (e.g. Zezi, Maome, Le Báb e Bahá'u'lláh, parmi lezot).  Soley laverite i lev lo lorizon Lagras Divin, e repann son reyon dan lemonn. Sa zour, Naw-Rúz, i konsakre pour konmemor sa bann profet.

Ki si sa lekinoks konman en senbol Manifestasyon Bondye?

Si ou tradwir li literalman, lekinoks i vedir ‘lannwit egal’. I sa moman ler soley i pozisyonnen direkteman parlao lekwater later, e ler lekivalans fernwanr ek lalimyer i balanse : 12-erd-tan lizour e 12-erd-tan lannwit. I en moman balanse pandan lannen. I reprezant Soley de Verite ki pe briye avek resplandisans lo lekwater limanite.  

Bahá'u'lláh, dan Kitáb-i-Aqdas, Liv Sakre Baha’i, i dekri Naw-Rúz konman sa zour Bahá'í kan lekinoks prentan i pran plas. Anvi ki zour Bahá'í i konmans soley kouse, si lekinoks i pran plas zis avan soley i kouse, sa zour ki ti konmans sa soley kouse presedan, i Naw-Rúz.  Sa lannen, lekinoks prentan i tonm Dimans le 20 Mars, 7.33 diswar ler Sesel, e alor Naw-Rúz pou ganny selebre depi soley kouse Dimans le 20 Mars ziska soley kouse le 21 Mars.

Selebrasyon Naw-Ruz

Lekinoks prentan i en letan renouvelman pour lanatir ensi ki pour imen. I larive Prentan e i en letan spesyal kot i annan en lenerzi eksepsyonnel dan nou plannet, kan lavi limenm pe ganny renouvle akoz lenerzi pe emerze sorti dan later kot in reste dorman pandan liver.

Naw-Rúz i enn parmi nef zour sakre Baha'i kot bann Baha'i i pran konze pour obzerv sa lafet, e bann zanfan pa al lekol. I ordinerman en zour lafet ki ganny obzerve avek bann rankont kot bann aderan ek zot bann zanmi i zwenn ansanm pour lapriyer, sanson, lanmizik e menm danse. Sak pei i modifye zot selebrasyon annakor avek zot kiltir e zot fason prefere.

Nou sezi sa loportinite pour swet tou Baha'i e tou dimoun ki pe selebre sa zour, en zwaye Naw-Rúz e en lannen ranpli avek benediksyon divin e posibilite pour lepanouisman spirityel, personnel e kolektif.

Kontribye par lakominote Baha’i