Dan Lasanble Nasyonal |18 March 2022

Dimoun i bezwen aret zet salte bonnavini, pran zot responsabilite pour protez zot lakaz ek biznes

Swivan gro linondasyon dan lavil ek distrik Mont Fleuri, sirtou Corgat Estate, Vandredi pase, Minis pour Zafer Entern, Errol Fonseka, in dir ki tou dimoun i bezwen aret zet toudsort kalite salte dan lanvironnman e dan bann larivyer e pran zot responsabilite pour protez zot propriyete e anpese ki delo i rantre dan bann lakaz si i annan ankor en sitiasyon parey.

Minis Fonseka in dir ki sa linondasyon ti en flash flood ki en fenomenn tre rar asosye avek enstabilite dan ler lokalize dan latmosfer e osi sanzman klima.    

I’n fer resorti ki pour adres bann sitiasyon koumsa i demann plis prevansyon e en legzersis kordinen.

I dir ki gouvernman in fer plizyer travay pour adres problenm linondasyon enpe partou dan pei depi ki nouvo ladministrasyon in pran lofis.

Minis Fonseka ti donn sa bann leksplikasyon letan i ti pe reponn en kestyon par MNA Wallace Cosgrow. Kestyon Onorab Cosgrow ti konm swivan: “In annan bokou konsern par popilasyon an zeneral swivan lapli ki ti koz inondasyon dan plizyer landrwa sirtou dan distrik Mont Fleuri e lavil kot bokou propriyete in sibir serten domaz:-

Eski Minis responsab pour Risk ek Dezas i kapab enform sa Lasanble kwa ki pe ganny fer pour ki sa sitiasyon pa repete?”

Minis Fonseka in osi dir ki departman lanvironnman i annan kontra avek 65 kontrakter pour netway bann larivyer me sa i reste ankor en gro defi akoz pour tro bokou letan en kantite dimoun in pran zot en move labitid pour zet zot salte partou e dan larivyer e pa pran responsabilite pour konsekans zot aksyon.

‘’Sa mantalite lesefer i enn ki nou pa pou kapab kontinyen tolere. Servis probasyon ek prizon pou travay an kolaborasyon avek minister lanvironnman pour fer sa bann travay netwayaz pour retir bann debri dan desarz bann larivyer’’.

Minis Fonseka in dir lot responsabilite dan bann ka parey se pour kordin tou bann antite anba Disaster Risk Management Division (DRMD) pour asire ki resours i ganny byen deplwaye depandan lo gravite en lensidan.

I dir ki ansemoman DRMD pe revwar tou son bann regilasyon, prosesis kordinasyon avek bi met sa servis lo en lot nivo.

Me Minis Fonseka in osi ensiste ki problenm pa avek larivyer, ni lanmar, ni letan me avek nou imen e nou latitid e mantalite ki bezwen sanze.

Lo son kote dan en kestyon siplemanter Onorab Cosgrow ti dir ki Minis Fonseka dan son larepons pa’n reponn kestyon lo kwa ki DRMD e kwa ki son minister in fer pour rezourd sa sitiasyon e asire ki i pa ariv ankor.

Minis Fonseka ti reponn ki i napa kontrol lo letan pour anpese ki en tel sitiasyon pa ariv ankor.

I ti remet lanfaz lo prevansyon e demande ki tou dimoun i pran zot responsabilite e pran tou mezir neseser pour protez zot biznes ek zot lakaz tandis ki li gouvernman i ava fer leneseser pour asire ki tou bann desarz delo swa dan lavil e dan bann distrik i ganny byen antretenir e bann larivyer i ganny byen netwaye e debouse a tou moman pour asire ki dan bann sitiasyon parey delo i annan ase bataz pour pase.

Lo kote bann dimoun ki’n ganny afekte dan distrik Mont Fleuri, Minis Fonseka i dir zot sitiasyon ava ganny evalye par Minister Gouvernman Lokal e zot ava ganny asiste dapre bann rekonmandasyon ki ava ganny fer baze lo bezwen sak sa bann fanmir.

Marie-Anne Lepathy