Konsey Nasyonal Lazenes i organiz en rankont foutbol pour bann zenn fiy   |12 March 2022

Pour konmemor Lazournen bann Madanm le 8 Mars 2022, e osi 24enm lanniverser Konsey Nasyonal Lazenes Sesel (SNYC), anviron en karantenn fiy sorti kot lekol Pointe Laure ek Perseverance segonder ti zwenn ansanm avek manm tim foutbol nasyonal madanm Sesel pour en sesyon lesanz.

Sa lesanz ant sa bann fiy ti ganny organize par sa konsey an kolaborasyon avek Federasyon Foutbol Sesel (SFF) ek lekol Pointe Larue segonder.

Sa lesanz i osi form parti progranm ‘meet and greet’ organize par sa konsey kot i annan lesanz ant zenn avek lezot akter dan lasosyete pour esanz lide ek konnesans.

Tou le trwa tim ti sakenn demontre sa ki zot konnen dan foutbol atraver en pti demonstrasyon bann teknik ki zot in aprann. Sa demonstrasyon ti swiv par en lesanz leksperyans ek teknik kot bann lantrener ek zwer tim nasyonal Sesel ti gid e montre sa bann zenn fiy lekol segonder lo plizyer teknik zwe foutbol.

Apre sa, sa bann fiy ansanm avek bann zwer nasyonal ti anmiz zot lekor dan bann rankont amikal.

Parmi bann spektater kot sa rankont byen animen ti sekreter prensipal pour lazenes ek spor, Msye Ralph Jean-Louis,  sef egzekitif Konsey Lazenes, Manmzel Penny Belmont, ladministrater distrik Pointe Larue, Manmzel Vesna Gertrude, bann ansennyan ledikasyon fizik, lezot ansennyan ek zanfan lekol.

Direkter pour seksyon lepanwisman ek byennet (empowerment and wellbeing) dan Konsey Nasyonal Lazenes, Marcus Mederick, ti dekri sa lazournen konman en sikse ranpli avek bokou lazwa ek lanmitye parmi bann zwer ek spektater.

I ti azoute ki sa dan limenm ti azout en lanpler pozitiv avek sa aktivite.

Nou prezant serten moman for sa aktivite atraver portre.

Patrick Joubert