Lazournen Enternasyonal bann Madanm   Madanm i selebre zot lakonplisman, partaz leksperyans   Par Marie-Anne Lepathy |09 March 2022

Partisipan ek envite dan en portre souvenir

En group madanm diferan laz sorti dan tou kous nou sosyete ti zwenn ansanm yer dan en foronm en demi zournen pour selebre zot lakonplisman e partaz zot leksperyans.

Bann partisipan ti enkli bann madanm an retret apre en parkour lavi ekstraordiner dan diferan domenn, bann avek sakenn zot defi lavi ki zot in bezwen sirmonte pour reisi akonplir zot rev e fer sa karyer ki zot in swazir, osi byen ki bann ki dan profesyon ki lontan ti asosye selman avek bann zonm.

Sa  foronm, ki ti deroul kot Lotel Savoy Beau Vallon, ti form parti aktivite pour konmemor Lazournen Enternasyonal bann Madanm e i ti en linisyativ Minister Lazenes, Spor ek Lafanmir dirize par Minis Marie Celine Zialor.

Pour akey tou bann madanm kot sa foronm, le de sekreter prensipal dan sa minister – Msye Clive Roucou pour Lafanmir e Msye Ralph Jean Louis pour Lazenes ek Spor, ti la pour ofer zot en pti bouke fler pour atas lo zot.  

Sa foronm ti konmans avek en sanson dedye a tou bann madanm  par gran vedet fanm dan lanmizik  Sesel Marie-Antoinette Dodin e sa ti swiv par en refleksyon spirityel par Madanm Soona Oliaji.

Osi prezan dan lodyans akote Minis Zialor ti Minis Devika Vidot e Minis Patricia Francourt, Premyer Danm Linda Ramkalawan osi byen ki plizyer lezot madanm ki pe okip bann pozisyon kle dan nou  pei. 

Prezidan Wavel Ramkalawan lo son kote ti’n vin anmenn son sipor e partaz detrwa mo lankourazman  avek  sa group madanm e felisit zot pour kouraz ek determinasyon dan zot parkour ek lakonplisman.

Letan i ti pran laparol pour adres tou bann ki ti prezan, Minis Zialor ti fer rapel ki tenm enternasyonal pour Lazournen Enternasyonal bann Madanm sa lannen i ‘Egalite zonm ek fanm ozordi pour en fitir soutenab demen’ e ki soutenabilite pa nouvo pour bann fanm e tou Seselwa.

Minis ti dir ki li son refleksyon lo sa tenm se ki madanm i annan en gran lyen avek lanatir ek kreasyon akoz zot osi zot kree e sa i fer zot spesyal e annan sa lyen pros avek lanatir ek lanvironnman.

I’n demann tou madanm pour fer enpe plis zefor pour kapab viv pli an armoni avek lanatir.

Minis Zialor in fer resorti ki dan son minister, aparti sa lannen, zot pe osi entrodwi en tenm nasyonal e sa lannen i ‘Selebre lakonplisman bann madanm Seselwa’.

“Pour tro bokou letan pandan sa dernyen de-z-an nou’n sibir bann restriksyon kot bokou lanfaz in mete zis lo bann problenm e non pa kwa ki nou’n akonpli pour nou kapab selebre. Me ki fason nou kapab selebre bann madanm? I pa neseser nou fer gro lafet me atraver en selebrasyon senp me tre profon kot dan prezans sa bann madanm nou eksprim nou lapresiasyon avek detrwa mo rekonnesans pour sa ki zot in akonpli e fer zot konnen ki nou valoriz zot e apresye zot e sa i sifi e vedir bokou pour zot ler zot tande pandan ki zot ankor vivan,” Minis Zialor ti fer resorti.

Minis Zialor ti penn en gran portre diferan group madanm dan nou sosyete e travay ki zot fer me ki byen souvan sosyete i tant pour bliye pour montre lapresiasyon ek rekonnesans pour tou sa ki zot fer. 

Ladres Minis Zialor ti swiv par en seri video par bann madanm diferan laz ki ti partaz zot parkour  e temwannyaz lavi e osi zot lakonplisman e sa ti enkli en zenn kaptenn ek dokter dan lafors defans, en zenn madanm ki vey zanfan, en madanm 103-an, parmi lezot.

Ti osi annan en performans ladans kanmtole pour rann omaz Madanm Marietta Matombe, en madanm ki ti toultan pe pouse pour ki nou kiltir ek ladans tradisyonnel i trouv son vre plas dan nou sosyete me ki malerezman ti mor lannen pase. Son manman, madanm Marie-Madeleine Matombe ne Freminot, ti la pour temwanny sa omaz a son fiy.

Sa foronm pour selebre bann madanm ti osi enkli en diskisyon latab ronn kot madanm diferan laz e diferan profesyon enkli en madanm 3enm az, en zenn ekonomis, gouverner Labank Santral, Miss Seychelles e premye pilot elikopter Sesel ti rakont zot parkour e partaz zot leksperyans avan ki bann madanm dan lodyans ti osi donn zot reaksyon e partaz zot prop leksperyans lavi.

Me alafen sa foronm mesaz enportan ki ti sorti se ki i domaz ki lamazorite sa bann madanm bokou dimoun dan sosyete pa konn zot parkour ek zot lakonplisman.

In annan en demann pour ki sa bann madanm i vin pli vizib pour ki lasosyete i apresye zot e bann lezot manm ek zenn fiy i ganny enspire par zot parkour ek lakonplisman.

Ti osi annan demann pour ki i annan plis bann tel selebrasyon lakonplisman parey pour bann madanm letan ki zot ankor vivan.  

Fodre dir ki parmi bann madanm ki’n akonpli bokou dan sosyete me ki ozordi pe ganny ravaze par maladi e bezwen deplas dan en sez roulan me ki ti osi prezan kot sa foronm ti Madanm Jessy Freminot ki renonmen dan domenn kiltirel e madanm Ginette Gamatis ki ti en madanm parlmanter pour bokou lannen.

Bann portre ki akonpanny lartik i montre serten moman for sa foronm.

Portre par Louis Toussaint