Foronm alokazyon Lazournen Enternasyonal bann Madanm ‘Egalite ozordi pour en lavenir soutenab’. |08 March 2022
Sa foronm an progre (Portre par Joena Meme)
Ti anba tenm ‘Egalite ozordi pour en lavenir soutenab’ ki en foronm ti ganny organize resaman par Divizyon Resers ek Planifikasyon Polisi dan departman Lafanmiy konman parti en seri aktivite pour selebre lafet bann Madanm.
Sa tenm, ki osi tenm enternasyonal lazournen bann madanm, in ganny swazir pour rekonnet bann madanm ek zenn fiy ki pe kontribye e menm diriz travay dan domenn sanzman klima pour ed lemonn adapte, fer fas avek bann defi e anmenn solisyon dan zefor pour batir en lavenir soutenab.
Sa levennman ki ti deroul le 4 Mars 2022 kot Sant Konferans Enternasyonal, ti deroul dan prezans direkter zeneral divizyon resers ek planifikasyon polisi, Madanm Jane Larue e direkter zeneral pour dimoun aze ek dimoun ki pe viv avek dezabilite, Madanm Rosa Morin, parmi lezot envite sorti dan diferan landrwa e travayer sa divizyon.
Dan son ladres pour lans sa diskisyon, Madanm Larue ti fer resorti ki sa lannen, bann tenm enternasyonal pou bokou relye avek sa size sanzman klima e ki alor nou bezwen form parti sa refleksyon e fer bann diskisyon sinifikativ lo sa size.
Sa enn diskisyon, fasilite par Msye Robert Moumou, ti vwar partisipasyon Msye Benjamin Vel konman konsiltan, Madanm Jeanette Larue, direkter zeneral pour ledikasyon e sansibilizasyon kominoter dan Minister Lagrikiltir, Sanzman Klima ek Lanvironnman, de zenn manmzel – Elsia Françoise, kouronnen Mis Lanvironnman Enternasyonal Sesel ek Axelle Bodwell, ki Prezidan Lorganizasyon Non- Gouvernmantal ‘SIYAH’ Sesel e osi en etidyan lekol Pointe Larue segonder, Melchizedek Solin.
Apre lentrodiksyon bann partisipan, bann pwen lo langazman bann fiy ek madanm dan domenn sanzman klima e zot lenplikasyon dan lefe sanzman klima lo lanvironnman, lekonomi e devlopman sosyal ti ganny aborde. Sa ki swiv se serten pwen ki ti ganny elabore.
Bann partisipan ti fer remarke ki menm si bann fanm napa tro gran lekar avek bann zonm Sesel se bann fanm ki sibir plis presyon ki lefe sa fenomenn i anmennen akoz zot rol e responsabilite kot lakour ki an mazorite i ganny dirize par bann manman e bokou manman tousel. Alors se bokou plis bann manman ki soufer logmantasyon dan pri komodite, ki saroy seo delo dan letan lasesres, ki pran swen avek zanfan letan dezas i arrive, ensideswit.
Sa fenomenn in kanmenm anmenn serten lefe pozitiv par lefe ki in revey dirizan dan pozisyon kle lo lenportans pran swen avek nou plannet e fors zot lanmen pour aliny polisi ek lezislasyon diferan sekter pour siport e sovgard sa azanda. Lezot devlopman ki ankouraz plis latansyon lo konservasyon ek proteksyon lanvironnman tel ki letid, lanplwa, fon pour finansman proze ek lezot lenvestisman in ganny entrodwi. Tousala i permet bann fiy ek madanm ki’n devlop en pasyon dan sa domenn pour kontribye anver en lavenir soutenab.
Konsiltan Msye Vel ti partaz rezilta en travay ki in fer ki demontre koman prezans bann madanm i domin bann domenn ki konsern sanzman klima Sesel. Me lefe i reste, dapre bann ki annan leksperyans bann rankont enternasyonal tre o nivo, ki malgre logmantasyon dan partisipasyon bann madanm, bann zonm i ankor pe domin pozisyon kle ki permet zot fer bann desizyon final.
Bann partisipan ti dakor ki bann fiy ek madanm aktivis ki pe ede konbat lefe negativ sanzman klima i annan en fason fer ki permet zot non selman atir bann zanfan e zenn garson me osi persevere ziska ki zot atenn zot lobzektif. Zot deza bann model pour bokou me nou bann fiy ek madanm pli vilnerab osi i bezwen ganny edike plis lo sa size pour zot vwar son lyen avek lavi toulezour. Legzanp ti ganny donnen lo leokri bann pep endizenn, mazorite bann madanm, ki pe soufer lefe destriktiv sanzman klima dan serten pei. Sesel, nou bezwen asire ki nou bann madanm, bann manman i edik zot zanfan pour fer bann senp aksyon ki pou fer en diferans.
Size poursantaz teritwar proteze ki aktyelman 52% ti leve e lamazorite partisipan ti dakor ki i en gran lakonplisman. Me pwen kestyon ki ti swiv se eski pei i ase ekipe an term resours pour sirvey sa grander teritwar? Apard resours imen, sizesyon sete pour regard posibilite entrodwir bann lekipman teknolozik pour ede dan sa travay. Lefe ki gouvernman i limite an term resours, travay bann lorganizasyon non gouvernmantal i vreman neseser osi byen ki zefor sak sitwayen e viziter parey.
Ti ganny fer resorti ki sirveyans i osi mars avek aplikasyon lalwa ki osi en defi prenan kont lafors resours imen me ti ganny sizere ki plis lankourazman dan form bann benefis i ganny ofer a bann biznes ki enplimant bon pratik soutenab.
Avan ferm diskisyon, sak partisipan ti ganny sans pour partaz zot mesaz e swe;
Manmzel Françoise ti fer rapel ki nou devret rekonnet e siport bann zefor ki deza pe ganny fer par kre plis loportinite bann biznes ki viz ver adaptasyon e ofer solisyon pour bann lefe sanzman klima.
I ti osi met lanfaz lo bann loportinite letid avanse e devlopman profesyonnel ki bann zenn i merit sezi pour en karyer solid dan sa domenn ki ava permet bann fiy e madanm antre dan bann posizyon kot zot kapab fer desizyon.
I ti demann plis langazman personnel, ankor plis kreasyon bann lorganizasyon non gouvernmantal, plis kolaborasyon ant bann lorganizasyon kle e travay pour akse bann loportinite finansman pour bann proze.
Manmzel Jeanette Larue ti partaz son lazwa konsernan bann lakonplisman, sanzman e progre ki in temwanye pandan son kantite lannen dan domenn ledikasyon e lanvironnman. I swete toudmenm ki bann envestiser i donn bann zefor konservasyon e proteksyon lanvironnman en pli bon lakey olye regard bann zofisye ki reglemant devlopman konman bann lennmi.
Madanm Larue ti osi partaz son swe pour medya donn latansyon bann zanfan e zenn ki pe angaz zot dan sa varyete aktivite pozitiv pour byennet nou plannet dan en zefor pour promouvwar zot e enfliyans piblik an zeneral.
Msye Vel ti fer resorti ki Seselwa i devret sanz zot fason panse lo sanzman klima ki annan en lyen direk avek sak Seselwa e non pa en size ki konsern selman bann ki enterese pour gard en lanvironnman sen pour konserv lekonomi tourism Sesel.
I osi panse ki pei i bezwen konmans koz pli for lo adopsyon en ‘lekonomi sirkiler’ e menm viz ver sanzman striktir e rol tradisyonnel lafanmiy kot madanm i aret zot progresyon karyer a en serten moman zis akoz zot responsabilite lafanmiy.
Manmzel Bodwell ti ensiste ki sanzman klima pa sipoze en ‘after thought’, kot lezot size aktyalite i touzour ganny plis latansyon e sanzman klima ganny pouse pli ba lo lalis priorite.
I ti soulinyen ki later i nou sel lakour e ki napa plannet ‘B’. Manmzel Bodwell i konvenki nou aksyon ozordi i kapab fer en diferans pour zenerasyon fitir ki malerezman pa pou zouir sa ki zenerasyon pase in zouir pour ankor enpe lannen. Son lapel pour bann dirizan se pour pa perdi ankor letan me plito vin pli brav e pran bann dezisyon pli radikal pour fer pli gran lenpakt parey ki zot in fer dan ka pandemi Covid-19 ek lager.
Melchizedek ti fer remarke ki lavwa bann pli zenn pa touzour sonn for e alor pa ganny ekoute parey zot swete.
I ti fer rapel kanmenm ki bann zanfan e bann zenn pe fer en kantite keksoz pozitiv pour ede avek lalit kont lefe negativ sanzman klima e ki zot pe fer en diferans.
Responsab pour progrannm dan Divizyon Resers e Planifikasyon Polisi, Madanm Nathalie Didon ki ti organizater prensipal sa aktivite, i swet tou madanm bonn fet e eksprim son swe pour plis kolaborasyon e aktivite ki selebre lakonplisman bann madanm.
En kontribisyon Divizyon Resers ek Planifikasyon Polisi dan Departman Lafanmiy