Ron Payet i resant bann sanson David Philoe |16 February 2022
Santer e mizisyen Seselwa Ron Payet in resaman fer sorti en albonm lo ki in resant 10 sanson en lot santer tre renonmen David Philoe e lo sa albonm i annan zis en sanson ki pour Msye Payet.
Sa albonm i annan pour tit ‘Tribute to David Philoe’.
Msye Payet i dir i ti’n deza konmans met enpe kopi lo marse dan mwan Desanm me apre in retire akoz menm si dimoun ti’n konmans aste, avek lafet Nwel ek lannen i ti santi dimoun pa ti pou ekout li parey sanmenm i ti deside pour esper Nwel ek lannen pase e apre retournen avek son travay.
Msye Payet i dir ki pour lemoman albonm i anvant anliny lo Tropical Soundz e osito ki i pou retourn lo marse manm piblik ava konnen atraver bann lanons e piblisite ki ava ganny fer.
Dan en entervyou avek Radyo Sesel kot in koz lo sa travay, Msye Payet i dir ti toultan enn son rev pour en zour enterpret bann sanson Msye Philoe.
“Mon rapel mon ti ankor tre zenn e Msye David Philoe ti fer son albonm kot nou e toultan mon’n apresye son bann sanson akoz son bann parol i byen aplike e byen ankadre e mon ti toultan dir dan mwan menm ki en zour fodre mon sant son bann sanson,” Msye Payet in dir.
Me vre en bon pe letan apre i ti enterpret enn sanson Msye Philoe ki annan pour tit ‘Ler in Sonnen’ e Msye Philoe ti byen apresye e ti felisit li e dir li ki son lavwa i al byen avek son bann sanson e ki i ti ava vreman kontan si i ti ava resant ankor lezot son bann sanson.
“Mon ti dir li mon ti ava apresye si i donn mwan permisyon pour fer li. Vre apre nou’n asize nou’n koze e tonb lo en pti lagreman e in donn mwan permisyon e vwala mon’n sante e in vreman apresye. Menm ler mon ti resant ‘Ler in Sonnen’ mon ti ganny bon feedback avek dimoun, zot ti apresye en kantite sa sanson,” Msye Payet i dir.
Msye Payet in fer resoti ki dan son group i annan trwa zot ki zwe ansanm e parmi en fiy, Aline Marie, ki’n fer enpe lakonpannyman e albonm in rikord kot Studio General Bel Ombre e Msye Payet i dir in byen apresye kalite son e sa travay an zeneral.
Me tou dimoun i konnen ki Msye Philoe i annan en kantite sanson alor ki mannyer Msye Payet in swazir bann sanson pour li resante?
“Mon’n swazir bann ki pour en bon pe letan mon pa’n antann zot parey ‘Dir Mwan Laverite’. Sa i en sanson ki toultan mon’n kontan e apre i annan ‘Ler in Sonnen’, ‘Mon Ale’, ‘Zan bat labaget’, ‘Soley i lev pour nou tou’, ‘Ti La’ ki li mon’n donn li en pti stil moutya e mon pa’n konmans li dousman pour apre al pli vit me mon’n tenir son ritm e mon vwar li in sorti ase byen.”
Letan i ti pe koz lo sa bann sanson ki in swazir, Msye Payet i dir in gard zot orizinalite menm si in met en pti laganm par kote.
“Ou pa kapab defigir travay en dimoun. Mon pa kapab sant parey li akoz David i en lezann dan lanmizik Kreol e en dimoun koumsa son bann sanson pa fini e mon ti a kontan dir li ki mon admir li, son travay ek son bann sanson akoz kot keksoz i byen ou bezwen dir.”
Msye Payet in fer resorti ki si i ganny permisyon Msye Philoe e si i santi i annan demann i kapab sant ankor lezot son bann sanson.
Me apard sa nouvo albonm ki Msye Payet pe fer lo lasenn lanmizik sirtou avek sa sitiasyon Covid-19?
“Keksoz i vreman difisil akoz konman en artis mon ti pe depann lo mon lanmizik. Me la, menm si i annan bann lotel kot mon ti pe zwe mon vwar ki zot pran lavantaz lo bann sitiasyon parey Covid kot zot dir tan ki lotel pa 80% plen ou pa pou kapab vin zwe me selman ler zot plen zot pa dir ou e ou pa kapab fer nanryen e ou pa kapab lager avek zot akoz zot pli for ki ou. Anplis ki sa ler ou tande ki i annan menm dimoun ki dir lanmizik pa en metye me nou nou depan lola pour viv e mwan mon lavi antye mon’n fer lanmizik. Deor i annan artis ki pe viv lola e pe sonny zot fanmir avek zot lanmizik e ler ou tann sa bann keksoz ou zis demande be ki pe arive konmsi?”
Mesaz Msye Payet pour tou bann fàn se “siport artis lokal akoz i annan nou ki depan lo nou lanmizik pour nou viv alor aste orizinal”.
“Alor letan zot pe mazin fer kopi e partaz en sanson, toultan mazinen ki i annan en artis ki pe depan lola alor toultan e otan ki posib aste en kopi orizinal.”
Antretan Msye Payet in remersye Msye Philoe ek son fanmir pour donn li sa loportinite pour fer sa travay e in eksprim swe ki zot kapab kontinyen travay ansanm alavenir e in osi eksprim swe ki Msye Philoe i kapab en zour vwar li pe fer en lot travay li osi.
En konpilasyon Marie-Anne Lepathy