Ile Perseverance in ganny son lanblenm ofisyel ek son moto |23 December 2021
Nouvo lanblenm Ile Perseverance desinen par Tyra Anthony (Portre par Louis Toussaint)
Distrik Ile Perseverance in ofisyelman ganny son lanblenm ek son moto parey tou lezot distrik dan pei.
Sa lanblenm ansanm avek moto sa distrik ki ‘Ansanm dan Linite’, pou ganny mete lo bann dokiman ofisyel osi byen ki devan sa de biro ladministrasyon (Ile Perseverance 1 ek Ile Perseverance 2) lo sa zil.
I ti ganny devwale par son de administrater – Aaron Bonnelame pour Ile Perseverance 1 ek Nichole Gabriel pour Ile Perseverance 2 – pandan en seremoni ki ti ganny fer yer bomaten kot lekol segonder sa distrik.
Zot ti apre prezant sa lanblenm avek manm Lasanble Nasyonal pour sa distrik, Onorab Desheila Bastienne.
Sa aktivite ti deroul dan prezans Minis pour Gouvernman Lokal ek Zafer Kominoter, Rose Marie Hoareau; son sekreter prensipal Kevin Perine; lezot reprezantan sa minister osi byen ki bann sorti kot sa de biro ladministrasyon dan Ile Perseverance; bann ‘sponsors’; artis ek serten zabitan sa distrik, enkli zanfan, parmi lezot envite.
Sa lanblenm ki definir lidantite e vizyon kominote Ile Perseverance, i rezilta en konpetisyon ki ti lanse lafen Oktob 2021 e gannyan ti Tyra Anthony, en etidyan Lenstiti Lar Vizyel (Seychelles Institute of Art and Design) ki reste Anse Aux Pins.
Tyra i dir ki sete bann stil lakaz ek bann pye sed lo sa zil ki’n enspir li pour fer sa lanblenm. In pran li trwa semenn pour fer.
I dir ki sa lanblenm, ki demontre bann lakaz, pye sed ek en fanmir dan en ron ki pe ganny tenir par en lanmen, i demontre devlopman ek linite dan Ile Perseverance.
Konman pri, Tyra in ganny en pannyen (hamper), R2000, sertifika ek en ‘shield’ sorti kot minister, dinen pour de Hilton Labriz Hilton Resort and Spa, sorti kot sa lotel, ek en sak kado (gift bag) ofer par Airtel.
Ti annan douz lanblenm dan sa konpetisyon e sete lanblenm desinen par Sabrina Andre ki ti sorti dezyenm e trwazyenm ti enn desinen par Robert Suzette. Zot pri ti en sertifika sakenn ek dinen pour de kot lotel Constance Ephelia e Berjaya Beau Vallon Bay.
Dan son diskour, Minis Hoareau ti retras legzistans Ile Perseverance depi son konsepsyon 22-an pase ler proze konblaz ti konmanse anver son kreasyon. Sete an 2011 ki sa zil ti konmans akeir son bann premye rezidan sorti dan tou kwen pei.
Minis Hoareau ti azoute ki enpe plis ki 10-an plitar, Ile Perseverance in transformen avek prensipalman bann younit lakaz kot bann fanmir in byen etabli zot e ki firanmezir, lezot fasilite ek servis kominoter pe pran zot plas.
I ti azoute ki bokou in ganny fer pour konstrir en kominote for e rezilyan, osi byen ki travay ver promosyon en sans lavi kominoter gide par lespri linite, solidarite e lapartenans parmi bann rezidan.
“Pour ki en kominote i solid e rezilyan, i enportan pour annan en zefor kolektif. I enportan ki zabitan pa zis viv ansanm dan en kominote me zot osi bezwen konnen kwa ki pase dan zot kominote. Zot bezwen zwenn ansanm e reste touzour angaze pour fer zot kominote vin pli meyer,” minis ti fer resorti.
I ti remersye tou bann ki’n ede donn Ile Perseverance son lanblenm ek son moto e swet tou dimoun, espesyalman zabitan Ile Perseverance, en bon Nwel ek en bon Lannen 2022.
Lo son par, Onorab Bastienne ti osi remersye bann ki’n zwe en rol pour donn son distrik son lanblenm ek son moto ofisyel enkli sa sanson par bann artis sa distrik pour elev moral.
I ti dir ki menm si sa zil i separ an de, dapre faz konstriksyon, zot tou ansanm zot form en sel distrik, anba en sel non, liste lo map Sesel.
Enn bann ziri, Barbara Denousse, ti dir ki menm si ti annan zis douz lanblenm dan sa konpetisyon, zot ti alaoter e zizman pa ti fasil pour sa trwa manm ziri.
Pandan seremoni, ti annan lansman en nouvo sanson avek tit ‘Perseverans’ konpoze e sante par bann artis ki reste Ile Perseverance tel ki Mervin Camille, Dereck Bonnelame (Gato), Michael Savy, Giselle Sultan, Maria Thomas, Hazel Larame ek Langia Boniface, dedye a zot zil.
Ti osi annan en performans ladans par bann zanfan.
Patrick Joubert
