Lasanble i konsider e aprouv bidze ankor en minister e plizyer antite |03 December 2021
Lasanble Nasyonal in yer kontiny son bann sesyon kot in konsider e aprouv bidze pour diferan departman ek lazans ki tonb anba Minister Lagrikiltir, Sanzman Klima ek Lanvironnman e osi en pli pti bidze pour Lofis Ombudsman ki en sonm selman 2 milyon 929 mil roupi.
En sonm 109.7 milyon roupi pour departman sanzman klima ek departman lanvironnman
Letan i ti prezant sa alokasyon avek Lasanble National, Minis Flavien Joubert ti fer resorti ki i en ogmantasyon lo bidze pour lannen 2021 ki ti en sonm 105.9 milyon.
Minis Joubert in fer resorti ki sa logmantasyon pou al dan lapey ek saler ki’n ogmante par 1.39milyon e sa i annan pour fer avek bann nouvo rekritman e osi transfer serten anplwaye sorti kot Minister Finans ki’n zwenn sa minister. Byen ek servis in redwir par 1.029milyon, depans in ogmante par 157 mil roupi e sa i enkli depans pour sekretaryat minis, transportasyon ek voyaz in redwir par 86mil roupi e in osi annan en rediksyon 60 mil roupi e sa i an relasyon avek mouvman staf ler zot deplase pour al fer travay lo diferan zil, 30mil roupi in redwir dan depans bis, taksi ek bato, kou pour travay mentenans ek reparasyon in desann par 454 mil roupi e in osi annan en rediksyon dan depans pour bann materyel ek fournitir.Bann manm Lasanble ti annan bokou kestyon pour sa minister konsernan bann diferan proze ki annan pour fer avek amelyor lanvironnman ek lakot dan bann distrik, netwayaz zeneral ek zesyon salte dan distrik parmi lezot ankor avan ki zot ti vote pour aprouv sa bidze.
120 milyon 416 mil roupi pour departman lagrikiltir
An sa ki konsern sa alokasyon bidze, Minis Joubert ti eksplike ki restriktirasyon dan sekter lagrikiltir in fer ki lazans lagrikiltir ek lazans biosekirite nasyonal in ganny restriktire pour form departman lagrikiltir e pour fasilit sa prosesis e asire ki bidze sa departman i legal lalwa pour lazans lagrikiltir in ganny repeal e lalwa pour lazans biosekirite nasyonal in amande anliny avek nouvo striktir sa sekter.
«Me menm si in annan sa restriktirasyon, lobzektiv ek fonksyonnman sa de lazans i reste parey pour fer ki nou vin pli efektiv e efikas pour delivre en meyer servis pour nou bann kliyan,” Minis Joubert in eksplike.
Konsernan alokasyon bidze departman lagrikiltir pour lannen prosen, Minis Joubert i dir i enkorpor sa ki pour sa de lezot lazans.
Ladan, en sonm 36.5 milyon roupi i pour lapey ek saler e osi bann tranzaksyon avek lazans lenfrastriktir. Byen ek servis in ogmante par 47milyon roupi, bann lezot depans in osi ogmante, kou pour mentenans ek reparasyon in osi ogmante. Minis Joubert ti detay tou bann lezot provizyon pour diferan kou e depans dan sa bidze.
Apre bokou deba ek kestyon par bann manm zot ti vote pour aprouv bidze sa departman.
En alokasyon bidze 25 milyon 723 mil roupi pour Komisyon Lenerzi
Letan i ti prezant sa sonm dedye pour Komisyon Lenerzi pour lannen prosen, Minis Joubert ti dir ki pour 2021 sa komisyon ti ganny en bidze 81milyon525mil roupi ki en gran parti ti sa alokasyon anba sa proze korperasyon avek Lasin e aktyelman 90% sa larzan ki ti konpri sa alokasyon in fini ganny depanse.
An sa ki konsern bidze sa komisyon pour lannen 2022, Minis Joubert in fer resorti ki zis 4 milyon roupi ki annan pour fer avek travay toulezour sa komisyon tandis ki sa lot porsyon i reprezant 10% ki reste lo sa proze avek Lasin ki ekspekte realize Sesel ver lannen prosen.
Bidze Komisyon Lenerzi ti osi ganny laprouvasyon bann manm Lasanble.
247milyon 181mil roupi pour Lazans pour Lanbelisman ek Zesyon Salte (LWMA)
Minis Joubert ti fer rapel Lasanble ki pour 2021 sa lazans ti ganny en alokasyon 242 milyon 892 mil roupi e pour lannen prosen son bidze in ogmante pour ariv 247milyon 181mil.
I ti eksplike ki lapey ek saler in ogmante par 1milyon 74mil roupi avek bann transfer serten staf, byen ek servis in osi ogamante par 2milyon 711mil roupi, bann depans pour lofis in ogmante par 41mil roupi, transportasyon ek vwayaz in ogmant par 8mil roupi, mentenans ek reparasyon in redwir par 1milyon 153mil roupi, i annan en logmantasyon 189mil roupi dan depans pour fer avek bann nouvo kontra pour netway larivyer ek lanmar, zesyon twalet piblik in redwir par 606mil roupi, in annan osi en logmantasyon 5.438 milyon e sa i konpri depans pour netway bann lans piblik, depans pour netwayaz bin sites ek bus shelters in ogmante par 7.8milyon roupi e sa i annan pour fer avek bann nouvo kontra. Minis Joubert ti osi detay lezot konponan sa alokasyon bidze avan ki bann manm ti ganny sans pour demann plizyer kestyon e rod klarifikasyon lo plizyer pwen.
Sa bidze in osi ganny laprouvasyon Lasanble.
En sonm 15milyon 64mil roupi i bidze pour Lazans Meteorolozi Sesel
Sa enn alokasyon bidze ti ganny aprouve san okenn deba.
Alokasyon bidze pour lofis Ombudsman i en sonm selman 2 milyon 929 mil roupi
Ti dan son sesyon tar yer apremidi ki Lasanble ti konsider e aprouv bidze sa antite ki ti ganny prezante par Ombudsman sa lofis, Madanm Nichole Tirant-Gherardi.
Madanm Tirant-Gherardi ti fer resorti ki bidze son lofis in kontinyelman redwir pandan sa detrwa lannen ki’n pase e sa i prensipalman akoz i pa ankor kapab reisi rekrit bann nouvo travayer konpetan e avek kalifikasyon neseser pour travay dan sa lofis. I dir parmi son pli gro defi i resours imen pour donn bann servis neseser.
Lasanble Nasyonal i kontiny deba lo bann alokasyon bidze ozordi bomaten.
Marie-Anne Lepathy