Lasanble i aprouv bidze ankor 2 minister e osi sa ki pour tou zot bann diferan antite |02 December 2021
Dan son sesyon travay ziska tar yer Lasanble Nasyonal ti diskit e rod klarifikasyon lo plizyer pwen avan ki zot ti aprouv bidze Minister Lanplwa ek Zafer Sosyal a en sonm 87 milyon 934 mil roupi e en sonm 14 milyon 718 mil roupi ki bidze pour Minister Transpor.
Se Madanm Patricia Francourt, Minis pour Lanplwa ek Zafer Sosyal, ki ti defann sa bidze akonpannyen par son de sekreter prensipal – Jules Baker (pour lanplwa) ek Linda William-Melanie (pour zafer sosyal).
En lot antite ki tonb anba sa minister ki son responsab Madanm Shella Mohideen ti’n vin defann son bidze, ti Konsey Travayer Sosyal e li son bidze i en sonm selman 654 mil roupi.
An sa ki konsern bidze departman lanplwa, Minis Francourt ti eksplike ki an 2021 i ti ganny bidze anplis pour kapab rekrit travayer anvi bann defi Covid-19.
Minis Francourt ti osi fer resorti ki an 2020 sa departman ti ganny en bidze 38.491 milyon roupi me dan milye lannen minister finans ti koup 1.5 milyon ladan lefe ki ti annan retar dan rekritman ki fer ki bidze pour sa lannen 2021 ti redwir pour vin 36.991 milyon roupi. Me la ki sa departman in fini konplet bann prosedir rekritman son bidze pour lannen prosen i 37.786 milyon e sa i fer ki 24.417 milyon roupi pour al dan saler e 13.369 milyon roupi pour al dan byen ek servis. Anvi en logmantasyon 2.859 milyon anba byen ek servis, sa i fer ki bidze pour sa departman in ogmant par selman 795 mil roupi.
Pour sa ki konsern bidze pour departman zafer sosyal, Minis Francourt ti eksplike ki pour lannen prosen bidze pour sa departman i 50.848 milyon roupi e sa i reprezant en logmantasyon 18.241 milyon roupi konpare avek lannen 2021.
«Sa logmantasyon i senpleman en poursantaz bidze pour sant Youth Hope anba PSIP kot en sonm 16.025 milyon roupi in rezerve pour li e larestan i dan saler e osi byen ek servis,» Minis Francourt in eksplike. Sa bidze i osi montre en logmantasyon dan saler ki’n sorti 31. 907 milyon roupi an 2021 pour ariv 34. 123 milyon roupi an 2022.
Minis Francourt in osi fer resorti ki priyorite sa departman se konstriksyon en sant pour bann adolesan avek konportman difisil e ki bezwen led pour reaziste zot lavi.
I dir sa provizyon 16.025 dan bidze 2022 a va ede pour serten travay konmanse lo sa sit ki’n idantifye osito ki tou diskisyon i finalize. I’n osi dir ki plan sa batiman e lezot lenfrastriktir neseser i ekspekte finalize boner lannen prosen si tou keksoz i al dapre plan.
Apre bokou kestyon ek klarifikasyon lo bidze sa bann antite, Lasanble ti vot a linanimite pour aprouv bidze Minister Lanplwa ek Zafer Sosyal e bann manm ti osi donn zot sipor inanim bidze Konsey Travayer Sosyal.
En bidze 27.475 milyon roupi pour Lazans Proteksyon Sosyal e 1 bilyon 444 milyon 865 mil roupi pour tou son bann benefis ek progranm
Antite Lazans Proteksyon Sosyal ki osi tonb anba Minister Lanplwa ek Zafer Sosyal ti vwar son bidze 27.475 milyon roupi aprouve par Lasanble osi byen ki tou bann benefis ek progranm anba sa lazans ki a en sonm 1 bilyon 444 milyon 865 mil roupi.
Minis Francourt ti eksplike ki bidze Lazans Proteksyon Sosyal in redwir par 30% konpare avek bidze 2021 e sa i dir i akoz 10.2 milyon roupi in ganny transfer anba gouvernman lokal pour servis lanterman, 984.555 mil roupi i sevings ki sa lazans in fer akoz in anmenn lefikasite dan peyman ki i fer dan distrik. Sa in vin atraver rekonmandasyon Labank Mondyal pour ki bann kliyan zot resevwar zot benefis atraver zot kont labank.
Apre bokou kestyon e klarifikasyon par bann manm Lasanble ti vote 29 pour person kont avek en manm ki pa ti vote pour aprouv bidze Lazans Proteksyon Sosyal e zot ti vote 30 pour e en abstansyon pour aprouv bidze pour bann benefis ek progranm sa lazans.
Bidze Minister Transpor en sonm 14.718 milyon roupi i ganny laprouvasyon Lasanble
Se Minis responsab pour Transpor Antony Derjacques ansanm avek bann zofisye son minister e responsab bann diferan antite ki tonb anba son minister ki ti’n vin reponn kestyon bann manm lo zot alokasyon bidze.
Minis i dir ki bidze pour departman laviasyon sivil, por ek marin e departman transpor, lannen 2021 ti 13.150 milyon roupi e pour lannen prosenn in ogmante par 1.8 milyon roupi.
Bann depans anplis pou kouver nouvo sekretarya sa minister ki aprezan i kouver tou brans gouvernman ki annan pour fer avek transpor e ki aprezan i tonb anba en sel minister.
Sa bidze ti ganny laprouvasyon Lasanble.
21.386 milyon roupi pour Komisyon Transpor lo Later (Road Transport Commission)
Sa antite ki osi tonb anba sa minister ti ganny son bidze aprouve par Lasanble apre bokou kestyon, klarifikasyon ek deba.
12.459 milyon roupi pour Lotorite Maritim Sesel
Minis Derjacques ti fer resorti ki bidze sa lotorite pour 2022 in ogmant par 1.384 milyon roupi e sa logmantasyon pou al dan saler ki’n mont par 681 mil roupi. I osi annan logmantasyon dan bann depans pour lofis, transpor, mentenans, byen ek servis parmi lezot.
Lasanble ti donn son laprouvasyon sa bidze apre bokou diskisyon lo plizyer pwen ki bann manm ti rod leklersisman lo la.
164.240 milyon roupi pour Lazans Transpor lo Later
Sa alokasyon pour sa lazans ti osi resevwar laprouvasyon bann manm Lasanble apre ki lamazorite zot ti’n rod klarifikasyon e demann bokou kestyon lo plizyer proze semen dan zot distrik.
Lasanble i kontiny son diskisyon lo bann alokasyon bidze ozordi.
Marie-Anne Lepathy