Lotorite distrik rezyon les ek Gouvernman Lokal i egey kominote |02 November 2021
Sa benn pandan enn zot performans Brilliant letan zot ti’n aret en moman pour egey kominote (Portre : Joena Meme)
Avek pandemi Covid-19 ek bann restriksyon lasante piblik anplas, plizyer aktivite organize pour konmemor Festival Kreol in sa lannen ganny tire lo kalandriye aktivite, e lezot in lo en pli pti lanpler avek partisipasyon limite.
Avek bi pour anmenn sa selebrasyon pli pre avek piblik, bann administrater distrik Cascade, Pointe Larue, Au Cap ek Anse Aux Pins, in zwenn ansanm avek Minister Gouvernman Lokal ek Zafer Kominoter, pour anmenn enpe laganm ek lanbyans dan sa rezyon les Sanmdi apremidi, atraver en latroup mizisyen mobil, ek en group danser e dansez.
Aparti 1er apremidi, latroup ki ti’n abiye dan labiyman tipikman kreol ti demare an montan Brilliant, kot zot ti arete dan bann plas konvenab e met en pti spektak pour tou dan kominote, osi byen ki bann motoris.
Zot ti apre desann dan lot direksyon pour al dan bann lezot distrik, kot zot performans ti byen ganny apresye par bokou.
Administrater distrik Cascade Berguitta Melanie ti eksplike ki sa aktivite i enn organize par bann lotorite dan rezyon les, pour asire ki bann zabitan dan sa bann distrik ek kominote respektiv i osi ganny en sans pour selebre kreolite ek leritaz Kreol.
«Avek pandemi nou pa’n kapab organiz aktivite kot bokou dimoun i rasanble, alors nou’n deside fer en keksoz pour nou rezyon antye. Sa bennpe zwe bann lanmizik tipikman kreol e bann zanfan ki pe danse i sorti dan distrik menm, e nou konman bann lotorite nou’n diskite e travay ansanm pour realiz sa aktivite,» Manmzel Melanie ti dir.
Zofisye Progranm kot minister, Loura Barra, i dir ki sa departman in byen apresye sa linisyativ pour anmenn bann tel aktivite dan kominote.
«Kot departman nou’n akeir sa linisyativ akoz i enn nou priyorite pour asire ki bann aktivite i alaporte tou dimoun, e atraver bann tel aktivite, bann ki pa kapab ou ki pa ganny sans pour al dan bann aktivite pli santral i osi ganny sans pour zot osi apresye e partisipe. I enportan sirtou la ki nou pe selebre lafet kreol ki tou dimoun i ganny en sans e santi zot parti bann aktivite,» Manmzel Barra ti azoute.
Allen Buron, en motoris ki ti ganny sans vwar bann performans tipikman kreol, ti byen apresye sa linisyativ.
«I pa toulezour ki nou vwar nou kreolite pe ganny selebre. Personnelman mon ti pou apresye si ti annan plis, pli souvan partou partou. I egey enpe lazournen,» Msye Buron ti dir.
Sa aktivite ti termin 4er apremidi.
Laura Pillay