Lenstiti Kreol i lans 2enm versyon editer teks Eplebyen |29 October 2021
Madanm Ben-David pe koz kot lansman editer teks Eplebyen 2.0 yer (Portre: Joena Meme)
Lenstiti Kreol an kolaborasyon avek Departman Teknolozi Lenformasyon (DICT) ti yer bomaten lans 2enm versyon editer teks Eplebyen, ki ranplas Eplebyen 1.0 ki ti orizinalman antre an fonksyon an Mars 2014.
Sa lansman ti form parti selebrasyon Lazournen Enternasyonal Lalang ek Kiltir Kreol.
Eplebyen 2.0 i en aplikasyon personalize pour lortograf Kreol Seselwa. Sa progranm in elabore apartir leksik Kreol Seselwa ki nenport itilizater Microsoft Office i kapab enstale e servi dan zot tretman teks an Kreol.
Menm parey ki ler laplikasyon Microsoft Word i souliny bann fot ki ou fer an Angle ouswa Franse, Eplebyen 2.0 pour fer menm zafer sof ki li i idantifye zis lerer lortograf e non pa okenn fot sentaks.
Eplebyen i reprezant en gran pa pour Sesel, konman en pti Leta Zil ki pe debout for pour son lidantite nasyonal e devlopman son lalang.
Konpare avek Eplebyen 1.0 ki ti ganny distribye lo en lakle USB, sa nouvo versyon i en progranm piblik e gratwit ki kapab telesarze e enstale lo konpiter a partir sit wèb Lenstiti Nasyonal pour Kiltir, Leritaz ek Lar (snicha.net).
I osi annan en gid video ki pour ed bann itilizater telesarz sa laplikasyon.
Sef egzekitif pour Lenstiti Kreol, Marie-Flora Ben-David, ti eksplike ki sa zouti teknolozi nimerik i ava ed bann endividi pour aprann metriz Kreol Seselwa e formil byen bann mo.
Bann endividi ki kapab benefisye avek Eplebyen i enkli bann ansennyan, poet, ekriven, zournalis, sekreter dan bann lorganizasyon travay parmi lezot ankor.
«Sa zouti i form par manda Lakademi Kreol Sesel pour devlop zouti lengwistik, donn sipor teknik e syantifik ki efikas nou bann kliyan ek partener,» Madanm Ben-David ti dir dan son ladres pandan lansman yer.
« Napa en sosyete san teknolozi e sak kiltir i entegre teknolozi dan son prop fason. Rezondet pour enkli teknolozi dan promosyon e devlopman lalang Kreol se pour stimil bann talan kreatif e kapasite pour servi teknolozi pour fer fas avek bann defi lengwistik ki lavi, sirtou Covid-19, i enpoz lo nou,» i ti azoute.
I ti osi fer resorti ki sak Lazournen Enternasyonal Kreol, tou le 28 Oktob, i apel nou pour renouvle nou zefor, langazman ek konviksyon e pour fer en moman refleksyon lo bann aki nou leritaz, istorik, lengwistik e kiltirel.
DICT ti konmans travay lo laplikasyon Eplebyen 2.0 an 2019.
Elsie Pointe