Interhearts Montessori i selebre lasezon Kreol |29 October 2021
Interhearts Montessori, en lekol maternel, in selebre Lazournen Enternasyonal lalang ek kiltir Kreol yer avek en aktivite Kreol ki’n byen ganny apresye par bann zanfan, ansennyan ek paran.
Pour sa levennman bann zanfan akonpannyen par zot paran ti’n abiy dan zot kostim tradisyonnel.
Direktris sa lekol, Manmzel Nadine André, ti dir nou ki sa i premye lafet Kreol ki sa lekol in organize.
«Pour nou Halloween pa fer sans akoz zanfan i plito per parske zot pti pti. Mon trouve i vo mye fer zot konn zot lidantite e selebre Kreolite dan son lansanm,» Manmzel Andre ti dir.
Ver 10.30 bomaten bann zanfan ti partisip dan en laserenad dirize par Msye Michel Farabeau e Msye John Vital ki ti zwe bann morso lanmizik tradisyonnel e bann zanfan ti danse lo ler sa bann lanmizik.
Ti annan plizyer gato parey gato bannann, gato koko, nouga, napolitenn, lafarin mai e ti osi annan plizyer legim ek gro manze anvant parey patat, manyok, koko, brenzel, zoranz lokal e ankor plizyer lezot keksoz.
«Tou sa bann zafer in ganny fer par lekol ek partisipasyon e kontribisyon bann paran ki’n apre osi ganny sans aste sa bann prodwi a en pri formidab. Bann paran ti osi ganny sans partisip dan bann zwe tradisyonnel.»
Bann zanfan, staf ek paran ti byen kontan sa pti lazournen ranpli avek lazwa e boner.
Lazournen ti termin avek en dezennen tipikman Kreol ki ti konpri satini mang, kari koko poul lokal, satini pwason sale, kordonnyen griye, manyok bwi avek katkat bannann dou konman deser.
Bann portre ki akonpanny lartik i montre enn de bann moman for sa lazournen yer kot lekol Interhearts Montessori.
Vidya Gappy
Portre par Louis Toussaint
