Lekol Anse Boileau segonder i ranport Kwiz Kreol enterskoler |27 October 2021
Lekip Anse Boileau, gran venker Kwiz Kreol (Portre : Thomas Meriton)
Lekol Anse Boileau segonder i gran venker konpetisyon nasyonal Kwiz Kreol organize par Konsey Nasyonal pour Lar ek Lenstiti Kreol dan kad bann aktivite pour selebre 36enm Festival Kreol sa lannen.
Final sa kwiz enterskoler ti ofisyleman pran plas yer apremidi kot Teat Nasyonal, Mont Fleuri kot bann finalis sorti lekol Beau Vallon ek lekol Anse Boileau ti batay kont kanmarad pour reponn maksimonm kestyon baze lo tenm lanmizik Kreol. Finalman ti lekol Anse Boileau segonder ki ti sorti venker avek en total 15 pwen.
Sa kat partisipan dan sak tim ti pandan premye e dezyenm seri kestyon reponn endividyelman avan trwazyenm seri kestyon kot zot ti kapab diskit larepons konman en lekip.
Sak seri ti konpri wit kestyon – serten odyo, serten vizyel e lezot dan form swazir dan bann opsyon larepons – baze lo lanmizik, lenstriman, ladans, santer e bann sanson tipikman Kreol.
Lekol Anse Boileau ti pe reprezante par Dylan Freminot, Andreano Florentine, Andrea Matombe e Reuben Morel tandis ki Vince Julienne, Elodie Ah-Time, Marita Barbe e Heidi Orphee ti pe reprezant lekol Beau Vallon ki ti termin sa kwiz avek 11 pwen an total.
Parmi bann zofisye Lenstiti Kreol ki ti realiz sa kwiz ti Madanm Christianne Albert, Jenny Samynadin e Erica Franchette konman prezantatris.
Apre kwiz, zofisye pour devlopman lar kot Konsey Nasyonal pour Lar, Joenise Juliette, ti adres tou bann partisipan, edikater e envite pour remersye zot pour zot zefor e sipor pour realiz sa aktivite.
Manmzel Juliette ti osi anons bann gannyan sa konkour, kot lekol Belonie ti sorti trwazyenm e Beau Vallon dezyenm.
Bann gannyan ti resevwar lenstriman lanmizik, en trofe, e lezot pri ki kapab ganny servi pour promouvwar lanmizik e devlopman talan artistik parmi bann zenn o nivo lekol.
«Bann zanfan, kontinyen ekout radyo, kontinyen fer resers lo nou kiltir, lo nou lanmizik Seselwa, sa ki’n pase e osi bann ki prezan. E sa bann kado ki zot in gannyen, nou pou vin fer en swivi kot bann lekol, nou pou an kontakt avek bann edikater pour vwar si zot pe antrennen avek sa bann lenstriman. Parey sa lekol ki’n ganny ‘banjo’, nou napa bokou zwer ‘banjo’ isi Sesel, alors mon ti a kontan si zot ti a rod en dimoun ki annan leksperyans dan zwe sa lenstriman e ki zot aprann zwe li pour ki demen nou ava ganny en zenerasyon ki pe monte e ki kapab zwe,» Manmzel Juliette ti dir.
«Sa bann tanbour moutya manrmay i kontan e ler nou fer Festival Moutya nou vwar bokou bann zenn. Alors al aprann bat li. Bann ki pa konn zwe gitar osi al aprann,» Manmzel Juliette in lans lapel avek bann partisipan.
Pri ti osi ganny prezante avek sa de partisipan ki ti le de meyer gannyan dan staz eliminasyon.
Tou partisipan sorti dan bann lekol ki’n partisip dan sa aktivite ti ganny prezante avek en tokenn e kado pour zot partisipasyon.
Lezot lekol ki ti partisip dan sa konpetisyon ti enkli Pointe Larue, Praslin e Mont Fleuri.
Laura Pillay
