Legzibisyon ek lavant fler kot Camion Hall Plezir pour lizye, lokazyon pour anbelir ou prop zarden |27 October 2021
Viziter kot sa legzibisyon ek lavant fler ek zarbis (Portre : Jude Morel)
Depi Lendi bomaten en gran kantite dimoun sirtou bann madanm ki kontan plante e fer koleksyon diferan kalite fler ek zarbis, in antre sorti dan zarden Camion Hall kot en gran legzibisyon ek lavant tou kalite fler ek zarbis pe deroule.
Sa aktivite ki’n konmanse lendi e pou ale ziska Vandredi le 29 Oktob in ganny organize par Lazans Lantrepriz Sesel (Esa) an kolaborasyon avek ‘The Violette Breeze Association’ pour koensid avek bann aktivite 36enm Festival Kreol.
Sef egzekitiv Esa, Angelic Appoo, in dir ki “vi ki i annan sa kanpanny pour ankouraz dimoun pour plant dan lakour, la i moman pour Seselwa ek touris vin vizit sa legzibisyon e konn plis lo bann diferan kalite plant ki diferean dimoun i annan. Sa I enkli bann plant dekoratif ek bann zarbis. Sa bann plant i osi form parti nou leritaz kiltirel e nou bezwen prezerv zot».
Manmzel Appoo i dir son lekip in pran trwa zour pour prepar landrwa pour akey en tel aktivite.
Me menm si bokou dimoun in vizit sa legzibisyon, pour bokou zot bann plant ki zot anvi i vreman tro ser e zot plito vini pour admir labote sa bann plant e fer kontan zot lizye.
«Ar be bann plant zot zoli menm e mon ti ava voudre kapab aste enn dan tou sa bann ki mon napa pour anbelir mon lakour me mon zis pa kapab afford,» en madanm ti dir.
I’n fer mwan konpran ki in aste zis de pti plant ki pa ariv 100 roupi sinon in zis fer letour e fer son lizye kontan.
Me par kont pour bann dimoun ki annan en pti pe plis mwayen finansyel la i zot sans pour vin aste bann plant e fer zot lakour vin pli zoli.
Pri bann plant i varye depi 10 roupi ziska 400 roupi.
Vidya Gappy
