36em Festival Kreol Bann zenn i promot lardon ek zedmo dan kominote |25 October 2021
Serten parmi bann lardon ek zedmo ki pe ganny promouvwar (Portre: Thomas Meriton)
Konman parti bann aktivite dan kad 36enm Festival Kreol, en group zenn rezyon Les Mahé in deside pour promot bann lardon ek zedmo ki ti okip en gran parti kiltir Kreol Seselwa dan letan pase.
Atraver bann pano ki’n ganny enstale dan bann diferan landrwa, sa bann zenn ti pe met an valer bann zedmo ek lardon Kreol Seselwa pour benefis bann zenn, e osi manm piblik anzeneral ki pa tro familye avek sa konponan nou leritaz kreol.
Sa aktivite in ganny fer konzwentman ant sa bann zenn zot menm ek Konsey Nasyonal Lazenes (SNYC), atraver bann travayer lazenes dan bann distrik respektiv.
In ganny dir ki lardon i plizyer fwa ganny konfize avek koze mirak (kan ou adres en dimoun fran dan son figir).
Lardon i plito ler ou pas en mesaz lekontrer pour en dimoun atraver en lot dimoun.
Dapre departman kiltir, lorizin lardon i reste enkoni, me dapre nou bann vye paran, depi byen lontan i egziste dan kiltir Seselwa, in sirtou koni parmi bann granmoun.
Touzor dapre sa departman, lardon ti ganny large ler en dimoun ti pase, sirtou si i pa byen avek sa dimoun, e sa ti sel fason pour pas li en mesaz.
Lardon i ankor touzour ganny pratike ozordi, i tre popiler dan bann sanson modern kot bann artis i servi sa platform pou denigre, oubyen maltret kanmarad, sa ki an Angle nou apel ‘diss’.
Roland Duval
