Fondasyon Leritaz Sesel i reouver ‘Lakaz Roza’ e lans legzibisyon Lakour Kreol Seselwa |22 October 2021
Fondasyon Leritaz Sesel in reouver ‘Lakaz Roza’ e osi ofisyelman lans legzibisyon Lakour Kreol Seselwa ek son zalantour dan bann lannen 1940.
Sa ti pandan en pti seremoni ki ti deroul yer Domaine de Val des Pres, Au Cap kot Lakaz Roza ek son Lakour Kreol i ete pa tro lwen avek grann kaz.
Fodre dir ki Roza ti sa nennenn Seselwaz ki ti travay dan sa grann kaz pandan sa bann lepok.
Son pti lakaz an bwa ki ti toultan la, ti kraze pandan movetan an Desanm 2019 ler en gro pye lafous lanmenm dan lari ti tonb lo li.
Apre bokou travay an kolaborasyon avek plizyer son bann partener, Fondasyon Leritaz Sesel in reisi rekonstrir Lakaz Roza tandis ki sa zarden Kreol dan son zalantour i en proze inisye par biro rezyonnal Unesco pour montre lyen ki annan ant kiltir ek konservasyon biodiversite.
Reouvertir sa pti lakaz ek legzibisyon son zarden i tonb dan kad bann aktivite pour konmemor 36enm Festival Kreol sa lannen.
Ti Anbasader pour kiltir, Msye Patrick Victor, manm Lasanble pour distrik Au Cap Kelly Saminadin, sef egzekitif Fondasyon Leritaz Sesel Manmzel Benjamine Rose ek direktris zeneral pour kiltir Manmzel Julienne Barra ki ti ganny loner pour diriz bann envite dan Lakaz Roza e lans louvertir legzbisyon sa lakour Kreol dan zalantour sa pti lakaz.
Lakaz Roza i en lakaz Kreol tipik sa lepok konstrir an bwa e planseye. Son bann miray i kouver avek papye zournal e plizyer portre Larenn Langleter. Son de lasanm dormi i annan lili an fer avek matla labour e dra kwentapi. Sak lasanm i annan son podsanm vi ki twalet i andeor lakaz.
Lezot de pyes sa lakaz i en pti salon meble avek fotey ek sez e osi en pti latab avek son granmofonn tandis ki lot pyes i lasal a manze avek son latab, sez ek lezot zartifay parey lasyet, bol ek lanmok emaye, ver parmi lezot.
Andeor lakaz i son lasanmben ki bord avek baton koko e kouver avek fey kot i annan son bake ek lezot resipyan pour transport delo ki pe koule atraver en ladal banbou dan en ganmel kot ros lave ki pa tro lwen avek zarden legim.
Twalet i en lot pti batiman enpe pli lwen avek lakaz e li osi i bord avek baton koko e kouver avek fey lantannyen. Li i en trou dan later me in planseye avek selman en trou ron dan milye.
Kot i konsern sa zarden ek son zalantour, li i konpri en kwen pour legim ek fri, en park avek 2 koson ladan, en kazo avek 2 poul ek en kok ladan, en langar avek plizyer zouti sarpantye anpandan me dan en kwen i annan en latab avek domino ek lezot zartifay ki fer li osi en landrwa rankont. En gro touf bannann i donn en bon lonbraz sa lakour me fer sir ki bann lenz tale dan zerb pour sofe e bann lo lakord pa ti mank larder soley. En tabli dan en kwen i ranpli avek bann zafer ki’n lave parey lasyet ek kastrol tandis ki en pike bwa dir li lo son bann brans tou bann lanmok, ver ek lezot pti resipyan pe degoute.
Letan i ti adres tou bann ki ti prezan kot sa seremoni, sef egzekitif Fondasyon Leritaz Sesel Manmzel Benjamine Rose ti fer resorti ki sa proze i enn ki tre enportan pour sa fondasyon akoz i form parti son manda pour promouvwar e prezerv nou leritaz e ankouraz partisipasyon piblik dan promosyon leritaz ek kiltir Seselwa.
I ti dir ki sa legzibisyon i annan en kantite lenportans – pour sovgard nou tradisyon e fer sir konnesans kiltirel i ganny transmet zenerasyon an zenerasyon.
Parmi bann dimoun prezan pour temwanny sa levennman ti en group dimoun 3enm-az, en group zenn e osi en group zanfan lekol.
“Pour premye fwa atraver sa legzibisyon bann zanfan ava kapab vwar e eksperyans en lakaz ek lakour Kreol Seselwa ek son zalantour mannyer ti ete alepok,” Manmzel Rose ti fer resorti.
I ti azoute ki sa legzibisyon i osi en latraksyon adisyonnel lo sit web Fondasyon Leritaz Sesel kot tou dimoun i kapab vwar. I’n osi fer resorti ki i en loportinite atraver proze tourizm kiltirel pour ofer bann viziter en leksperyans ekstraordiner lo fason nou bann zanset ti viv pandan sa bann letan pase en fason ki ler zot retourn dan zot pei zot ava kapab dir ki zot in viv en bon leksperyans kiltirel Kreol e zot ava kontinyen propaz sa mesaz pour nou.
Manmzel Rose in dir ki sa legzibisyon i osi en sours lenformasyon pour bann etidyan ek lezot endividi pour vin fer resers pour aprofondir zot konnesans kiltirel akoz i sel lo Mahé ziska prezan ki konplet.
I ti profite pour remersye tou dimoun ki’n ede dan en fason ou en lot pour realiz sa proze.
Fodre dir ki sete Cindy Moka, en zofisye proze e serser sinyor kot Fondasyon Leritaz Sesel ki’n konsevwar e siperviz realizasyon sa proze pour fer sir ki i annan en bon reprezantasyon sa lepok 1940.
Madanm Marianne Philoé Adrienne, enn bann madanm 3enm-az tre aktiv sorti distrik Anse Royale ki tre doue dan fer bann travay artizanal ek lakoutir in kontribye bokou ansanm avek led son bann lezot koleg pour anbelir Lakaz Roza avek bann kwentapi, bann tapi latab brode parmi plizyer lezot keksoz ankor ki in fer.
Madanm Adrienne ti osi fer en temwannyaz e partaz son leksperyans lavi dan en lakaz parey pour Roza dan bann lannen 1950 letan i ti ankor en zenn fir. I ti eksplike ki mannyer son fanmir ti viv.
“Malgre nou ti napa bokou larzan nou pa ti mank nanryen. Pwason ti annan, nou ti sonny nou poul pour nou dizef ek nou lavyann e nou ti plant tou sa ki nou ti bezwen,” i ti eksplike.
I’n profite pour envit nenport zenn ou adilt ki anvi aprann fer sa bann travay artizanal e osi lakoutir e osi konn plis lo kiltir ek leritaz kreol pour pa ezite pour pran kontakt avek li atraver Fondasyon Leritaz Sesel.
Lo son kote Madanm Penda Choppy, ki direktris Lenstiti Resers pour Kreol Liniversite Sesel, ti donn tou sa ki ti la prezan en pti apersi lo proze sa Zarden Kreol ki trouve dan zalantour Lakaz Roza.
I dir ki Zarden Kreol ti en proze inisye par biro rezyonnal Unesco pour montre lyen ki annan ant kiltir ek konservasyon biodiversite osi byen ki adaptasyon avek sanzman klima ek son bann zefor mitigasyon.
“Zanmen nou’n deza montre sa lyen oubyen travay vreman an kolaborasyon avek lanvironnman pour vwar sa lyen ant kiltir ek biodiversite. Sa proze zarden in vin konman nou proze pilot ki lekip Sesel ti prezant avek Unesco pour montre ki mannyer atraver nou kiltir nou osi kapab ede dan konservasyon biodiversite,” Madanm Choppy ti eksplike.
I ti azoute ki sa zarden i entersan akoz atraver resers ki zot in fer zot in dekouver ki nou fason viv e nou kreolite in konmans tre lontan atraver bann lesklav ki ti ganny zot pti kwen lo plantasyon zot met kot zot ti konmans zot pti zarden pour zot kapab sirviv. Sa pti zarden ti enkli zannimo, legim, fri, gro manze, plant medisinal e in kontinyen devlope e agrandi okour bann lannen pour enkli lezot plant parey bred mouroung ek rozanmer parmi lezot.
Lakaz Roza ek legzibisyon son lakour Kreol pou reste ouver toulezour e byento pou annan en video e osi en pti piblikasyon pour ilistre sa nouvo latraksyon ki viziter i ava kapab apresye e gard konman souvenir.
Bann viziter ti vizit Lakaz Roza ek son lakour pandan ki benn Lansiv ek son bann dansez ek danser ti pe egey zot avek lanmizik ek ladans tradisyonnel.
Bann portre ki swiv i anmenn en pe lanbyans pandan seremoni reouvertir Lakaz Roza yer e serten bann egzibit ki dan sa legzibisyon.
Marie-Anne Lepathy
Portre par Joena Meme
