Zenn i diskit lo lenportans valer ki form parti nou leritaz kiltirel |22 October 2021
Bann zenn pandan deba (Portre : Thomas Meriton)
Alokazyon Lazournen Mondyal pour Valer ensi byen ki Festival Kreol, en group zenn sorti dan diferan lekol segonder e pos-segonder ti yer partisip dan en deba lo lenportans valer ki form parti nou leritaz kiltirel.
Sa deba anviron 2erdtan ti ganny organize par Konsey Lazenes (SNYC) kot son lofis baze kot Sacos Tower.
Tenm sa deba ti ‘Idantifye valer e tradisyon Kreol dan en sosyete modern e diferan fason nou kapab re-entegre sa bann valer’.
Progranm ti konmans par en sanson enterprete par Jean Ally e en mo lakourazman sorti kot senior counsellor kot SNYC, Beryl Dodin.
«Ozordi lemonn antye pe selebre valer me Sesel pa’n zanmen selebre sa. Donk nou kot SNYC nou’n deside pour valoriz sa zour akoz nou anvi ki valer i ganny rekonnet dan lasosyte. Parey ou vwar tenm pour Lazournen Mondyal pour Valer i ‘Rekonekte’ e sa i tonm byen avek lasezon Kreol ek nou kiltir,» Madanm Dodin ti eksplike.
I ti note ki SNYC pe anvizaze konmemor Lazournen Mondyal pour Valer tou le lannen e swete ki sa lazournen i ganny selebre nasyonalman dan lefitir.
«Bann zenn ozordi pe diskit lo nou bann valer Kreol e nou lidantite ki nou’n erite. Me nou pe santi ki sa bann valer pe disparet par legzanp en senp bouzour ouswa eskize pe sorti dan nou sosyete alors nou pe fer zot debat lo la e vwar ki valer zot bann zenn zot pe pratike, ki difikilte bann zenn i gannyen pour pratik bann valer, eski i annan bann role model e zot kapab donn zot pwennvi e menm donn konsey. »
Sa deba ti enkli en panel 8 zenn ensi ki en lodyans zenn ki ti tous diferan topik tel konman valer kreol dan lekol ki pe perdi dousman dousman e ki mannyer lasosyete i kapab zwenn ansanm pour fer sir ki bann ki pe grandi i kapab apresye nou leritaz.
Elsie Pointe
